梁祝樓台恨

尋日與「哎呀大仔」北上開個唱，今次一早講左要唱以梁山伯/祝英台故事為題材嘅曲，數落真係好多架！唔知係咪寫曲嘅人江郎才盡，冇題材好寫呢？依家啲新曲唔係講陸游、李後主，就係梁祝！一個「騷」唱得七首曲，我早兩日去睇「騷」，七首曲中有三首都係講陸游！

以梁祝為題材嘅曲，遠嘅有「樓台會之一路上」、「樓台會之憑欄」、「樓台會之良朋」、「樓台泣別」、獨唱曲有「有情活把鴛鴦葬」、「山伯臨終」、「願為蝴蝶繞孤墳」、「英台哭墳」...近嘅曲有「梁祝樓台恨」、「恨鎖樓台」...唔知仲有冇遺漏！

尋日阿仔唱左九首，我唱左七首..哈哈！開個唱都係七首歌咋。阿仔上星期作病，不過佢成日話唱歌能醫百病；對佢嚟講，又真係好靈驗喎---越唱越勇！

「梁祝樓台恨」此曲有一位粵曲導師三前年俾左份曲我，佢當時話呢首係好曲，叫我學唱。不過，我太多曲要學啦，而且對唱曲要有平喉識唱先得，學左冇人陪我操都冇用吖！

早兩個月上伴奏班果陣，聽見老師跟人通電，我聽倒佢講：「「梁祝樓台恨」係好曲嚟，祇不過難唱，所以少人唱、甚至冇人唱之馬！」我一聽倒個「難」字、加上我又有曲譜在手，回家便速速拎嚟睇，再上網聽吓原唱，個人覺得真係唔錯，而且，難得嚟好聽嘅曲梗係要學啦。於是「的」起心肝學唱。

不過，依家好多新曲，難唱得嚟又難聽，不學也罷！

日期：2017年1月18日

地點：明輝

演唱者：東/Van

https://app.box.com/s/4n739nm6e08r6hrfjjhg3l2wci5zxb7e