《雲之彼端、約定的地方》

簡單到不行、甚至完全犯駁毫無邏輯的劇情，但影像美得教人感動，音樂動聽得打動人心……

那就是所謂的「影像詩人」。

日本有這麼兩個影像詩人－－電影的岩井俊二、動畫的新海誠。以前看岩井俊二的《四月物語》，會覺得劇本簡單到極，整齣影片就是一套極長的MTV－－靚人靚景靚音樂，但的確看得人心曠神怡。劇情？純粹是描述松隆子上大學後懷念以前中學時暗戀的師兄，That's All！

之前看新海誠的《秒速五厘米》，也有如此感受。【第一節】兩小無猜的一對小學生，女的搬走了，搬得很遠，男的乘火車去找她，火車誤點，遲到了，但女孩還在等他。【第二節】男孩升上中學，有個女孩暗戀他，但一直不敢表白。【第三節】男孩出社會工作了，偶爾仍會記起小時候的那女孩。我已很「詳盡」、「鉅細無遺」地講完整個故事的劇本了，就只有這樣，但畫面好美好美，音樂好美好美。

那是一份情懷。

同時也是一種痛苦。

須知道，我看電影向來是偏重劇情的，就像看小說那樣，要出乎意料之外、合乎情理之中；但影像詩人就是不來跟你講劇情，因為詩這東西，向來只講浪漫，講情懷。「淚眼問花花不語」，無啦啦喊乜Q，點解要問朵花，一切毋須解釋，盡在不言中。

那天我買了新海誠一齣舊作《雲之彼端、約定的地方》的VCD回家看，我的理性與感情分裂了……

理性：下？咁就完喇？

感情：係呀，完左喇咁就，嗚嗚嗚，好感動呀～～

理性：頂！有冇搞錯呀？！乜都冇解釋過就完？咁座塔乜傢伙呀？聯合國又乜傢伙呀？個女仔點解會醒架？

感情：呢Ｄ……需要解釋咩？

理性：梗係！我花左成個幾鐘頭，睇到一頭霧水喎！回水呀！

感情：你唔覺得好感動既咩？

理性：感動你個頭！佢話日本被聯合國霸左個北海道，我由得佢！座塔高到離譜，我都算！但聯合國無啦啦做乜會起座塔先？座塔居然會吸收宇宙發既夢，然後又連埋個女仔度？無啦啦個女仔個腦點會同座塔link埋一齊架？起碼都解釋下呀話？仲有，兩個初中生，居然識得整飛機？居然曉得set部飛機電腦？有冇咁過分呀？！最頂唔順既係，只要將個女仔放上飛機，載埋佢去北海道，佢就會醒番？頂～～

感情：呢Ｄ有乜咁重要唧？最重要係個女仔做左睡公主，有兩個男仔去救佢嘛！唔該你畀Ｄ少女情懷出黎好冇？

理性：X！男人老狗點咇Ｄ少女情懷出黎呀陷包散！

感情：你話邊個陷包散呀？

理性：話你呀陷包散！

感情：我頂你個肺呀！

遼國夆子：你地……唔好o係我個腦度嘈得唔得……