雞年賀詞
2017/02/02 08:44:36
網誌分類:
經濟
考一考你的急才，能否腦筋急轉彎，將這一些雞的俗語，扭轉觀點，說成好意頭的吉利說話呢？
雞犬皆升，預言來年個市好旺，一隻股升，帶動其他細股都升。又或升職加薪。一人得道，雞犬皆升，即係你跟到一個好上司，他升職，帶埋你扶搖直上。
雞髀打人牙骱軟，其實係讚人，懂得分享，略施小惠，籠絡他人，成功說服下屬，聽你說話，即係有管理才能。
雞鳴狗盜，讚個老闆，用人不拘一格、不同階層都能收為旗下，懂得聘用適合人才。
雞飛狗走，員工下班走得快，收工準時，不用加班，工作有效率。
雞毛鴨血，鴨血係好東西，打邊爐，麻辣鍋底，好好味，雞毛即係可以當令箭，你手執雞毛，預言你有機會升做主管。
雞犬不寧，開會時有不同意見，場面非常熱鬧，不會一言堂。
雞啄唔斷，即係你遇到好朋友，說話投機，非常啱傾。
雞同鴨講，即係你個人勇於溝通，面對不同族群，不同語言，都肯講肯說。
死雞撐飯蓋，即係話，你遇事臨危不亂，即使事情衰到貼地，你都可以扭轉敗局，來個回馬槍，討回一個尾彩。
鶴立雞群，此句讚的是鶴，貶的是雞，所以，從雞的角度，係有異類入侵，大家團結一致，對付外敵。
林超榮
回應
(0)
我要發表