信差人一成，何止雙目失明？

L 是退休警務督察，退休後兩夫婦優栽悠栽度日，閒時便遊埠，在港時一星期總有幾日行山，真係行遍港九新界各區。個人認為：退左休有錢、有時間、有伴，梗係要盡情享樂啦！唉，到左咁嘅年紀，難保可以玩到幾時？

我地相識超過廿年，當時大家工作地點是黃大仙。期後雖然各散東西，我與該區同事三兩個月都會聚聚，捉手談心(竹戰)。近半年，L sir提議去行山，之後竹戰。上次我因為律師約左食晏冇去，今次再約唔可以再推啦！

L 在群組表示由西貢西灣亭起步，經西灣、咸田、吹風坳、赤徑，終點在北潭坳，全程約三小時。我第一次跟佢地行山(平日都係講手，今次講腳)，同事問我：行三小時有冇問題？

我地一行八人，我年紀最大，佢問我係尊重同擔心。我答：行三小時？濕濕碎啫！我經常都行三小時架啦。

大家約左上午九時在西貢市「麥記」門前集合，乘九點班車入西灣亭起步點。我地大家都準時，但見排隊的人龍經已超過專車可乘載人數，因為下一班車要等到十一點，於是便立刻改搭的士(約九十蚊)，，去到西灣亭起點是九時四十五分。

上星期六天寒地凍、又陰又濕，照片經過L 調較：

涉水

攀山

嘩！過獨木橋？考驚呀！條橋有多處駁口冇左鏍絲，既驚佢唔安全，亦要擔心個人的平衡力、當日風好大，真係驚架！唉，山伯兄在那裡？英台妹妹要求救呀！

阿Sir講全程三小時，佢吖馬！佢兩夫婦同我另一位同事跑慣馬拉松，梗係冇事啦！我地行左足足四個半小時，中途冇休息、冇食嘢！真係飢寒交迫。而且果段路經常要上斜，行到有氣冇掟抖！其中一位團友響加拿大返港，跟朋友一齊來，中途見佢面青唇白，佢話暈；我問：你係見暈、定係見倒舊雲呀？

其實佢真係唔舒服，不過都好叻：行畢全程！唔叻又可以點？我建議：所有行山徑都有求救電話，想唔想試吓搭直升機嘅滋味吖？

我搭過啦，唔好玩嘅！我唔係鼓勵各位濫用資源呀，我搭直升機果陣係公幹。不過行山有不適，唔好逞強，有需要時咪求助囉！呢啲求救電話係要嚟咁樣用嘅。

捱到兩點幾先行到大路，大家即時歡呼----回到人間了！那時剛好見有巴士埋站，得番半條人命都仲要追巴士！但如果唔追、過後又唔知要等幾耐？出到西貢食晏，酒樓差不多落場，草草咁食左餐晏。

食晏時我向L sir投訴。

我：真係信你一成，何止雙目失明！我就嚟半身不遂添呀(回家即時浸腳，塗「喜療妥」，第二朝、第三朝..行路都係成個傷殘人士咁)。日後我會將你講嘅時數，加大三十個巴仙。

L：你地行得慢啫！

我：吓！我地完全冇休息喎，你地行得快，我地追倒你地果緊你地經已抖夠；所以我地基本上冇得抖。你唔可以用專業行山者嘅標準同我地呢啲尋常百姓嚟比較！自問我都好捱得、行得，但基本上你要事先告知團友要行果條獨木橋；自問唔夠膽嘅可以選擇唔去吖馬；去倒先知、難道再用兩個多小時行返去起點？再者，如果行四個半小時，中途係咪應該抖吓，飲啖茶、食個包先呢？

L：係、係、係！

冇法啦！持老賣老，冇人夠膽頂撞我。

我：言歸正傳，有啲嘢我有啲睇法，祇不過向你確認吓。果日你地「撐警」集會，場地係警察會，即係私人地方啦！何解有「已完」話係非法集會、話你地冇申請「不反對通知書」？

L：係呀！果個係私人地方，我地開會員大會，根本唔需要申請！

我：有「已完」話當日有半支警隊出席，所以認為警隊太多冗員喎！據我理解，警察係三班制，即係同一時間祇有三份一人需要當值；咁當日祇有不超過三份二人出席，呢啲人都唔係當緊班啦！下班後活動關人何事？我地尊貴嘅「垃圾會已完」開緊會工作期間都不務正業啦！

L：係呀！當中更有我兩夫婦(即部份係退休警務人員、家屬)、文職人員同警察嘅「粉絲」！

我：「七警」上訴，以我睇最多都係減刑啫；不過，即使唔駛坐監，淨係冇左份工、冇左長糧都好慘架啦！

L：唔係喎！我地認為問題係果個法官冇理由接納果段影片作為證供，因為拍果段片嘅人都冇出現，果段片有冇做過手腳又唔知、原告人都話認唔出果啲警員嘅樣，反而係個官自說自話至喎！一向以來，法庭都唔接納錄音帶之類作為證供，今次明顯係有問題！

大家明啦！我地啲「已完」就係咁嘅質素，仲要為人師表添，有咩嘢法子唔教壞啲年輕人吖！真係僱用佢嘅機構都好有問題囉！