hmvod逾千部猛片任你睇 蕭定一:做到又平又方便先得!
2017/02/27 08:41:13 網誌分類: 娛樂
時代轉變,觀眾開始追求有質素的OTT(Over-The-Top)電視平台,繼有線、樂視、Viu、Netflix及myTVSUPER後,蕭定一旗下的HMV數碼中國(8078)亦加入戰圈,推出hmvod點播平台,主打電影頻道,「我們三月一日開台,當日已有1500部電影供選擇,當中1200部係任睇,目標係可提供3000至5000部影片,之後還會有電影和演唱會同步睇。」蕭定一笑言click入hmvod就恍如入到hmv一樣,「根本同走入hmv無分別,無論係想搵音樂、電影、電視劇都一樣咁多選擇,仲要講緊只係收你一個好便宜的月費。」這實在是觀眾和業界一大喜訊,我要代表全港觀眾多謝他。 主持:黃柏高 統籌:林永匡 協力:彭子僖 攝影:李維隆、謝民光 場地:hmvkafe 隨着觀眾需求愈來愈高,一般免費電視已不能滿足需求,巿場上出現不少OTT電視平台,用戶可透過手機程式登入點選喜愛的節目,蕭定一正是睇中這行業的發展,大力開發巿場,「香港現時做得最多的是myTVSUPER,最為人熟悉的有Netflix,但都未有一個好適合香港人又或未有一個有好多華語內容的app,而做電影的都知道,DVD、VCD、Blu-ray這些我們稱為家庭娛樂的收入其實係不停下跌,像《殺破狼》這類好戲,其家庭娛樂收入跟票房完全唔成比例,但就冇一個人或公司係認真把香港作為一個基地去做這些網絡版權,大家都知內地網絡平台鬥得好勁,愛奇藝、騰訊、優酷,人家以內地計的版權都是過千萬,但在香港係零,這種事係完全唔合理的,而我一直希望有人去做,結果等了幾年都冇人去做。」 拉攏各大片商合作 睇準時機,蕭定一決定去馬,大力發展OTT網絡平台,花近一年時間拉攏各大片商,「其實好幸運,亦要多謝各方支持,基本上我們現在主力幾個studio,迪士尼、Universal、華納、SONY,他們每年新片的版權都會有,同時亦提供了七百多部經典電影給我們,同步我們亦有starTV、嘉禾、舊邵氏、寰亞、寰宇的Library全部都畀晒我,所以好僥倖,我們在三月一日開台首日已有超過1500部片可選擇,而這只是起步,我們目標係做到3000至5000部電影,還未計將來的演唱會,我們希望可以做多些電視劇,會係一站式平台,總之你入去都會搵到所有基本娛樂,有點似內地的愛奇藝網站。」這次可謂眾志成城,而最大受益者一定是觀眾,拿起手機、平板電腦便可隨時觀賞喜愛影片,方便至極,「以前我好誇張,可以一星期去戲院睇五日戲八部片,但現在有屋企有小朋友,成日夜晚無時間出街,會好期待一些電影可否快出碟畀我睇到,又或小朋友睡了可讓我即刻開來睇,但有時唔好話搵新戲,想搵library戲睇都好困難,將心比己,作為一個用戶,我都覺得係一件好事,非常之方便。」 一個月費任你loop 蕭定一表示,OTT平台還可做到跟戲院同步上映,令某類片種的支持者多一個渠道選擇,「有些細片未必可以上到好多戲院,有時你係好想睇,但根本冇戲院播,所以我希望可以做到跟戲院同步,就好似仍在戲院上映的賀歲片《小男人週記3》,我們成功爭取到,由三月四日開始跟戲院同步上映,我們還會Pack埋第一、二集,即係你可以三集一齊睇晒,所以會係一件幾好玩的事。甚至有些荷里活片我們可做到獨家,因是我們做發行,比如今年最期待的《LaLaLand》(《星聲夢裡人》),我們可做到獨家一個月或個半月,之後才畀其他平台播,預計戲院做到三月底,hmvod就五月底有得睇,之後還會有《波士頓恐襲》。hmvod係收月費,當中有1200部係Library任睇,而月費用戶每月都會有戲票送贈,供你選睇最新電影,比如《小男人週記3》、《StarWar》系列等,又或你簽長約,戲票又會多些,當然你唔想麻煩,單點一次購買都係可以的,但月費一定便宜好多。」 重本開拍《真.三國》 說到今年電影大計,蕭定一坦言計劃多又夠好玩,「我自己覺得最好玩一定係黃子華的《棟篤特工》,三月頭開拍,黃子華做特工我已經好期待,佢仲要係好專心坐喺我公司十個月度劇本,橋段係非常之好笑,雖然唔係一個超級製作,但就係一件好好玩的事,同埋可以一系列咁拍落去;年中還有兩部戲,一部係《暗黑者》,還有更好玩的是,我們會由頭開始拍三國演義,用新角度去拍,因我們在日本買了《真.三國無雙》的遊戲版權回來,會由頭開始拍,呢部真係大製作,亦真係貴。」 看到公司發展迅速,張建聲坦言會更加努力,提到最近趕拍中的《反黑》極具挑戰,全頭漂染成金的造型十分突出,張建聲笑說:「其實我今次來目的係跟兩位伯樂學習,多謝老闆畀機會我去試,今次角色表面睇,係演我自己偶像小丑,我想演繹一次自己的版本,我想每次都可畀觀眾一個期待,可見到張建聲每一年都有一個突破,而今年的突破稍後會再公佈,只可說好難亦好大挑戰,自己都有點壓力。」 |
| |
| |
| |
| |
| |
| |
回應 (0)
我要發表