CY連任？

自從特首提名期结束，確定左三人入閘後，「林鄭」風頭一時無兩！她成為泛民群起而攻之的對象，而親建派人物、傳媒則一面倒唱好，行情突然高漲。

原因好簡單啫！以泛民嚟講：阿爺支持者、佢地必反對！無論阿爺想捧「林鄭」定「葉劉」，佢地都會變成CY2.0，3.0....

至於佢地何解會捧「胡鬚」？講左1好多次啦：貪佢hea吖馬.....歷來奸臣都喜歡捧個柔弱嘅君主，咁先至容易控制！何解唔自己上？好多時因為佢地係宦官，想上都唔得！又或者名不正、言不順囉。

上星期六律師請食晏，除左我地班姊妹外、亦請埋我一位舊老板，呢位舊老板係男士，而我地班姊妹清一色係女士，所以我地聚會好少叫埋我舊老板，免得傾計時有所避忌；今次因為剛過年，當搵埋佢開年囉！噢，果日唔記得帶藤條添！

呢個組合，除左講時事，仲有咩嘢好講？

律師帶頭：「葉劉今次入唔倒閘，真係替佢難過！四人之中，佢愛國愛港可以肯定。當年阿爺要推廿三條，佢便義無反顧；雖然結果衰左，佢亦為此承擔責任，辭任局長啦！」

C校長：「佢雖然入唔倒閘，依然出席不同團體聚會，馬不停蹄喎！」

我：「據我對佢嘅了解，佢唔會因為入唔倒閘便將工作停頓，佢應承左要做嘅嘢、一定會做完佢！不過，做完之後會點，我就唔知啦！其實，即使佢入埋閘，四個人都唔係特首人選。係呢，H(我舊老板)，記憶中你好似跟過林鄭喎！」

H：「係呀！果陣時響社會福利署跟過佢。不過，我唔明佢何解要俾五百蚊個乞丐囉！」

律師：「係囉！佢冇理由唔知響香港，行乞係犯法架！佢響度鼓勵人行乞。」

C校長：「佢連用八達通乘港鐵都唔識！」

我：「哼！你識咩？你投訴長者兩蚊唔可以乘的士係虐老喎！」

C校長：「我咁講啫！我今日都係自己搭東鐵出嚟。」好叻架啦！由錦繡花園出中環喎----對佢嚟講。

L總監：「我最近聽倒個笑話---今次特首選舉冇人攞倒601票當選！結果係CY走出嚟講：我屋企嘅問題經已解決左，既然冇人夠我多票(689)，一於我抵吓諗連任啦！」

哼！哼！哼！咁都值得笑？