PACO名人會
PACO名人會
PACO名人會

「鐵三角」炮製愛情小品 邱禮濤讚感動:試吓睇多次

2017/06/05 08:41:17 網誌分類: 生活
05 Jun

        導演邱禮濤今年好戲連場,繼早前的《拆彈專家》及《失眠》,到6月15日上映的愛情小品《原諒他77次》,任何片種對邱導來說都是手到拿來。新片中,邱導加上「最佳拍檔」李敏做編劇,二人再次搵來14年在話題片《雛妓》中首度合作的蔡卓妍(阿Sa),飾演李敏原著小說下的女主角。編、導、演「鐵三角」默契十足,阿Sa首次跟周柏豪合作演情侶,好有新鮮感,加埋衛詩雅、雷深如(J.Arie)、鍾欣潼等,令人期待。連邱導睇完都嗌感動又襟睇,鼓勵觀眾「試吓睇第二次!」。

        英皇電影《原諒他77次》是編劇李敏著的同名小說改編,搵來蔡卓妍與周柏豪描述一段處於分手邊緣的愛情。故事細膩動人,阿Sa直言深受故事感動,主動促成是次拍攝。李敏亦有同感,她說:「咁多年嚟儲咗好多感情經歷,原來男同女對愛情嘅睇法好唔同,我本來想寫一啲狀況出嚟,點解女士會無故發脾氣?背後一定有佢原因,其實亦係自己嘅反思。每次爭吵當中,無人啱得晒,亦無人輸得晒!」邱禮濤有感而發:「人嘅情感到抉擇時,有啲位會好感動!後期製作時重複睇番呢套戲,睇完會感動又襟睇,可以睇第二次!」李敏亦笑說:「簡直係《愛情叉燒包》呀!哈哈!」

        阿Sa演技昇華

        選角方面,邱導和李敏同樣睇中阿Sa,導演謂:「我同阿Sa識咗好耐,合作過好多次,拍過《這個阿爸真爆炸》、《鬼馬狂想曲》、《雛妓》等等,今年拍《原諒他77次》和《常在你左右》(未上映)。佢好叻女又聰明,咁多年嚟演技開竅咗,又多咗女人味。而且佢份人好好,可以做到朋友,唔似其他演員只係roll機熄機,呢種合作更加開心。最重要阿Sa唔擺款,平易近人,片場上下都好喜歡阿Sa,Michelle(衛詩雅)都係㗎!」

        幫衛詩雅訂造角色

        李敏亦好同意:「阿Sa今次畀好多材料(感情經歷)我。而Michelle就係拍《失眠》時首次合作,睇埋佢之前多數演楚楚可憐角色,原來鏡頭後好活潑,呢個咪係我筆下嘅Mandy囉,所以度身訂造咗呢個角色畀佢。」Michelle在片中擔當重要角色,飾演一個非常進取的女生,周旋於阿Sa及柏豪之間,為幸福會一路去爭取的女仔。她說:「今次首次與柏豪合作,我之前唔識佢,但佢好好人,無畀壓力我,令我好快入戲。我哋有親密場面,柏豪畀到信任我去演,結果拍得好順利,真係要多謝佢。」

        J.Arie演出驚喜

        戲中另一驚喜,非唱而優則演的雷深如。J.Arie說:「戲中我係阿Sa、Yumiko(鄭希怡)和盧巧音嘅閨密。戲內我係人生勝利組,愛情、事業所有方面都好幸福和成功。亦因為我喺班姊妹中扮演大家姐和主導嘅角色,所以每次聚會都要有個勢。所以拍攝時,我不時問編、導攞意見,面對班前輩要點樣演?他們教我要有霸氣,壓住個場。」結果J.Arie的演出無令導演失望,李敏同樣大讚:「之前阿Sa喺makingof已讚J.Arie係一大驚喜。正因為佢過往演出,暫時以港女形象成功跑出,既然做得出色,我就話不如將『港女』發揮得更淋漓盡致啦!」於是成功塑造J.Arie演活一個「勝利港女」,係閨密中的大贏家。
        
        主持︰黃柏高
        統籌︰林永匡
        攝影︰袁東亮、謝民光
        協力︰林書鉉
        場地︰醉胡爐(電話︰26062106)
 
■J.Arie、導演邱禮濤、衛詩雅和編劇李敏,在英皇電影《原諒他77次》中合作愉快。
■J.Arie、導演邱禮濤、衛詩雅和編劇李敏,在英皇電影《原諒他77次》中合作愉快。
■其中一場,衛詩雅(右)好嬲柏豪,痛毆對方又「爆樽」。
■其中一場,衛詩雅(右)好嬲柏豪,痛毆對方又「爆樽」。
■分手男女愛恨交織,周柏豪最後向阿Sa下跪道歉。
■分手男女愛恨交織,周柏豪最後向阿Sa下跪道歉。
 
■片中,衛詩雅(右)敢愛敢恨;J.Arie(左)則係幸福港女,兩人勁有發揮。
■片中,衛詩雅(右)敢愛敢恨;J.Arie(左)則係幸福港女,兩人勁有發揮。
■李敏表示最喜歡探討人性,將返港大修讀心理碩士,期望撰寫一個100集、剖析不同心理人物的電視劇。
■李敏表示最喜歡探討人性,將返港大修讀心理碩士,期望撰寫一個100集、剖析不同心理人物的電視劇。
■阿Sa今次碌盡人情卡,包括搵鍾欣潼飾演日記店老闆娘。
■阿Sa今次碌盡人情卡,包括搵鍾欣潼飾演日記店老闆娘。
 
■蔡卓妍繼《雛妓》之後,再度與導演邱禮濤和編劇李敏合作新片。
■蔡卓妍繼《雛妓》之後,再度與導演邱禮濤和編劇李敏合作新片。
■J.Arie(左一)慶幸戲中閨密阿Sa(不在圖)、盧巧音(中)和Yumiko(右)好nice,鏡頭後可以交心。
■J.Arie(左一)慶幸戲中閨密阿Sa(不在圖)、盧巧音(中)和Yumiko(右)好nice,鏡頭後可以交心。
回應 (0)
我要發表
user