張繼聰領軍《今晚打喪屍》 吳家麗：末日時珍惜眼前人
2017/06/12 10:11:13
網誌分類:
生活
| 近年全球大熱的喪屍片，勁多Fans，我全力推薦一部非常精采的本土喪屍新片《今晚打喪屍》，將於6月29日上映。題材少有，主角亦好吸引，有好戲之人萬梓良「回歸」港產片，加上張繼聰和白只領軍，靚女陣容有吳家麗、顏卓靈Cherry和王敏奕Venus，驚慄之餘不失笑料。最重要係電影以喪屍做包裝，其實帶出的主題係「人喺末日，面對危機嘅時候會有咩反應、會做出咩抉擇？」正如家麗姐(吳家麗)和Venus有感而發：「我哋應該珍惜眼前人。」睇好戲又帶出人生意義，豈能錯過！ 電影改編自本地作家余兒的同名小說，由新進導演盧煒麟執導及鄭思傑監製，以喪屍、末日作主題。終極預告可見電影滲入大量本土元素，如過百喪屍圍攻西環山道，又有瘋狂賣樓的喪屍經紀，連雞蛋仔夾、褶櫈都可成為「殺屍武器」，港人應該睇得好投入。 片中主角身懷絕技，在喪屍圍城下，張繼聰及白只帶領眾人殺出重圍。顏卓靈在戲中飾演狙擊喪屍特別行動組的成員真一，她興奮說：「我喺戲入面，係一個外國回流嘅女仔，加入『組織』後有神秘任務。我對付喪屍嘅武器，係一啲高科技嘅嘢，都幾得意。我最難忘係一場喺保齡球場拍嘅戲，啲喪屍喺啲lane嗰度爬出嚟。飾演喪屍嘅演員真係好專業，佢哋喺戲入面啲肢體動作好唔協調，但係咁先最考佢哋嘅四肢協調性，好佩服佢哋。」 「喪屍」勁專業 吳家麗飾演Cherry的姑媽，接手父親的粵劇社當上班主，自幼理想係做個出色花旦。她說：「萬子哥（萬梓良）飾演我嘅初戀情人，佢害到我冇咗隻腳，實現唔到理想，佢坐監後出番嚟，我對佢又愛又恨。咁啱我收養咗佢個仔(白只飾)喺劇社。到喪屍病毒爆發嘅時候，阿聰同白只就喺我劇社拎咗啲道具，去製作土製武器打喪屍，好似血滴子，都幾有趣。」吸引家麗姐接拍此片，除了劇本好，亦因有好戲之人萬子哥坐陣，她說：「萬子哥係呢套戲嘅秘密武器，今次演出同以前有好大分別㗎！」 萬梓良「回歸」港產片 另一女主角王敏奕，片中飾演動作明星以璇，要由頭打到尾。她說：「我喺戲入面飾演被棄婚嘅新娘，仲係一個跆拳道高手，所以成套戲都要着住件婚紗打喪屍。拍嗰時件婚紗箍得我個胃好緊，所以我唔敢食飯。」而飾演喪屍王的灰熊，戰袍加身英氣十足，鏡頭後卻要預早化妝，他話：「我個喪屍王造型，要用三個鐘頭去特技化妝，出嚟個效果好正。今次好好玩，有一幕講我未變喪屍嘅時候，畀一百隻喪屍追，嗰場戲喺西環拍，好彩拍嗰陣時係Halloween，啲路人都冇咁驚。」 屍殺過程睇得過癮，但面對末日下，每人的反應都不一，正是電影要帶出的深層意義。Venus說：「呢部電影雖然以喪屍做包裝，其實佢帶出嘅主題係人喺末日，面對危機嘅時候會有咩反應、會做出咩抉擇，我要做英雄？定係去救人？」吳家麗亦有同感，「片中無論兄弟情、愛情及親情當中，最終都係表達珍惜眼前人嘅訊息。」 主持:黃柏高 統籌:林永匡 攝影:袁東亮、謝民光 協力:林書鉉 場地:Qi-NineDragons(電話：27998899) |
 | |
| |
 | |
| |
 | |
| |
 | |
 | |
| |
 | |
| |
 | |
| |
| |
 | |
| |
 | |
|
回應
(0)
我要發表
