浙江軒
尋日換左網誌嘅標誌相，因為朋友剛去完旅行，影左好多相；佢係專業攝影師，成日吹噓話佢用普通手機都拍倒專業照片喎！大家同唔同意呢？佢去嘅地方好多蜜蜂，所以佢影左好多蜜蜂嘅艷照。我問佢有冇影倒花，因為我喜歡用花嚟放上網誌----打死都唔放自己張相啦！我仇家多吖馬。雖然係花啫，都要eye-catching先吸引倒人架！佢俾左啲蜜蜂採花照片問我夠唔夠「吸精」？我答：「我唔要有蜜蜂嘅相，免得人地將我同隻「癡蜂」扯上關係。」佢俾左呢張相我，我問：「果隻係咪臭屁蟲？」佢答：係「綠色甲蟲」。呢張相夠唔夠專業呀？
有豬朋問：「何解我近期甚少講飲講食？」
我：「少出街食嘢囉！」曾經介紹過嘅食肆，如果冇特別又唔會再講。即使我一個人，我都喜歡自己煮嘢食！
尋晚約左朋友食晚飯，地點係「浙江軒」，我係第一次去。兩個月前我地也曾約左響呢度食飯，當時係我訂檯嘅；後來因事取消，今次再約，咪去返呢度囉，懶得諗吖馬！不過，兩次訂檯嘅經歷都好唔係咁開心，雖然食物唔錯，但我講明如果再去，唔好要我訂檯！
事緣：第一次我打電話訂檯。我個人習慣，訂檯第一件事會先講明係訂午餐定係晚餐，然後再講時間。那次我地約會取消，我致電食肆通知，才發覺佢地將我訂座時間寫左中午12:30；反正我要取消，嘰咕兩句便算。
今次再訂檯，搵左食肆電話後，發現原來可以網上訂座。心諗：網上訂座好吖，有電郵覆實、亦有訂座號碼，應該好安全架啦！誰料我去到才知道根本冇我的訂座記錄，我搵番回覆的電郵給職員看，她答：「你下次致電訂檯好些！」吓，咁食肆何解攪網上訂座？而且打電話訂座咪一樣出錯！好在尋日是閒日，要搵張四人檯不難！如果滿座，會點？
去得食江浙菜，梗係叫龍井嚟飲啦：
菜牌都用左蘇杭景：
一. 醉鴿：又係夾散左先醒起未影相！
二. 爽三樣(青瓜、粉皮、海蜇頭)：個人覺得海蜇頭太爽硬，而且涼拌汁有點辣！
三. 臭豆腐：用豆板醬、豪油作醮料。我食嘢唔喜歡醮醬料，不過臭豆腐炸得唔錯，外脆內軟。
四. 紅燒元蹄(半份)：魔鬼的食物！不過偶一為之，算啦。
五. 咸肉津白：通常食火腿或奶油津白，今次算係新嘗試，效果亦唔錯！
六. 友人說是「牛柳粒鍋巴卷」，我食落唔覺得係食緊牛肉！菜譜有一味叫：「松子雞粒鍋巴卷」---食左都唔知食咩嘢？不過好食！
七. 蔥油芝麻大餅：有驚喜！好食---黑白芝麻好香！裡面好似有肉鬆。
八. 高力豆沙：食埋甜品就完美啦！
食物質素唔錯，亦坐得耐！可能因為係閒日啦----我地呢餐飯都傾左三小時有多！埋單$1,100，四個人平均每位二百幾三百蚊，OK啦！呢度嘅食物通常預四人份量，亦有以件計，方便落柯打。