PACO名人會
PACO名人會
PACO名人會

《賭城》情侶客串變主角 阿叻陳法蓉:期待再合作

2017/07/24 08:41:13 網誌分類: 生活
24 Jul

        在娛樂圈能夠有一齊成長的同輩朋友確實難得,叻哥(陳百祥)就是其中之一,這位中學時期已認識的好朋友,最近難得參演電視劇《賭城群英會》,還有89年港姐冠軍陳法蓉合演一對,當然要邀請兩位齊齊分享拍攝感受。阿叻出名風趣幽默,這次現身除繼續大放笑彈外,大家還傾到將來合作的可能性,其實「賭」這個題材都是敝公司一項重要發展,好期待真的有機會跟叻哥和法蓉合作,而叻哥更搞笑道:「我一生人都未諗過喺呢個年齡創業嘅,撞到Paco哥,我有啲啲咁多機會啦!」

        主持:黃柏高
        統籌:林永匡
        協力:杜淑霞
        攝影:袁東亮、謝民光
        髮型:[email protected](陳法蓉)
        服裝:VIVIENNETAM(陳法蓉)
        場地:陶源酒家(29979303)

        跟叻哥老死的校長譚詠麟,原來都是《賭城群英會》的粉絲,法蓉還在社交平台多次發覺他力讚叻哥有演技,但想不到叻哥竟然連老友都玩埋一份,「佢有攞金馬影帝,但係佢唔知道金馬影帝係一個虛銜,真正演就好似演呢套劇咁,配到你(法蓉),你帶到我入戲,(法蓉:唔係呀!)咁我咪搞掂咗囉!我一生人都冇演過戲,Paco一路冇簽我,係初初以為我係歌星,我細細個唱歌,Paco已睇起我哋隊樂隊想簽兩個,但係我知道阿倫淨係識唱歌咩都唔識(法蓉:你讓畀佢?)唔好講讓,我放棄唱歌,諗住跟Paco拍戲,點知佢搵咗吳京嗰啲咁打得嘅出嚟,我又唔得啦喎!終於?家可能有機會,佢喺萬幾日之後,終於睇到我嘅演技。」

        客串兩日變兩月

        身為劇集男主角「是但哥」的叻哥,原來最初以為只是客串兩日,笑指俾王晶「呃」,「佢半夜3點鐘打畀我話『無論如何幫我客串!』我每年都會同佢客串一套戲兩日嘅,後尾睇到劇本『是但哥』咁多戲,我心諗唔會係我啩,你請咗謝賢,請咗陳法蓉、馬國明同佘詩曼,我點會多過三日戲呀!?家竟然拍咗兩……個幾月,但係佢好有本心,真係畀兩日人工喎!真係幾好朋友呀!」法蓉補充說:「我去到見到叻哥,叻哥話佢係客串喎!我話『唔係嘛!你係男主角嚟,點會係客串呀!咁你客串,我係咩呀!』哈哈!」

        為救愛人容易死

        講到拍攝時的趣事,飾演「十三妹」的法蓉就爆料,原來她本來不是畀刀仔拮死,「雖然『十三妹』啱啱『瓜』咗啦!但我睇劇本嗰陣係搵亂槍掃射死,所以我諗住會成身血,啲內膽仲着晒啲舊嘢,諗住用完就掉咗佢,我仲同叻哥講你啲私伙衫咁靚,小心我啲血,後尾就決定唔亂槍掃射,因為唔會個個走得甩㗎嘛!於是搵把刀仔拮死。我都有懷疑我咁好身手點會咁易呢?佢哋話我俾愛情蒙蔽咗,見到你愛嘅人有生命危險,你完全係唔知點算好,淨係諗住去救佢,所以一把刀仔就搞掂咗我啦!」

        兩個「後輩」無得頂

        談到一班「後輩」演員,叻哥繼續放笑彈,「你講阿謝賢同銘Sir(劉兆銘)呀?佢兩個OK啦!我細個睇《神鵰俠侶》(1960年),唔係古天樂嗰套喎!係謝賢同南紅。跟住喺電視台送黃杏秀返工時,睇到個劇叫《離別鈎》(1980年),又係謝賢同南紅,但南紅做佢老母啦!即刻覺得黃杏秀都係時候退休囉!唔係好快做黃日華同梁朝偉個老母!你睇謝賢就拍嚟拍去都仲喺度,第一冇離開過我哋,第二仲係風度翩翩腰直直咁,仲側側身霆鋒咁樣入嚟。另一個『後輩』,真係唔使講戲,一嚟佢跳舞出身,二來咁有經驗,但係原來佢嚟係為咗食薯片嘅啫!你估唔到佢拍呢套劇,係因為屋企唔畀佢食薯片,但嚟到片場幾種唔同嘅薯片擺晒喺度,咁佢就嚟咗開工啦!呢個就係銘Sir哈哈!(法蓉:佢係小朋友嚟㗎!)」

 
■叻哥講明Paco邀合作條件,「都係兩日錢,你話我就去㗎啦!」而法蓉就搞笑謂:「但我唔要做叻哥老母㗎!」
■叻哥講明Paco邀合作條件,「都係兩日錢,你話我就去㗎啦!」而法蓉就搞笑謂:「但我唔要做叻哥老母㗎!」
■早前叻哥和法蓉齊齊出席該劇宣傳活動。
■早前叻哥和法蓉齊齊出席該劇宣傳活動。
■不講不知原來「十三妹」最初是中槍死。
■不講不知原來「十三妹」最初是中槍死。
 
■叻哥和法蓉形容四哥和銘Sir是無得頂的「後輩」。
■叻哥和法蓉形容四哥和銘Sir是無得頂的「後輩」。
■原來2000年法蓉離開TVB最後套劇《生命有Take 2》已跟阿佘合作過。
■原來2000年法蓉離開TVB最後套劇《生命有Take 2》已跟阿佘合作過。
■叻哥和法蓉其實早在97年電影《精裝難兄難弟》演過情侶。
■叻哥和法蓉其實早在97年電影《精裝難兄難弟》演過情侶。
回應 (0)
我要發表
user