《扮工三姊妹》

2017/07/28 20:44:45 網誌分類: 職場
28 Jul

好有趣,我地Office出咗一隊扮工三姊妹,佢地以為自己扮得好出色,其實我地個個都非常心水清佢地有幾多料子啦!

 

 

先講阿大,平時最鍾意全黑打扮,好有心機朝朝盤起一個髮髻,有求於你嘅時候會嗲聲嗲氣,毛管都豎起晒,不過你唔好理,Work就得!有時行過佢個位聽到瘋狂打字聲,真心以為佢好忙架。再望多兩眼睇真啲,原來喺到用緊網頁版嘅即時通訊軟體Group chat緊,同一班裙下之臣打好關係,關心一下用在一時嘅兵大哥們,真係緊要過做正經野。佢個位就喺正走廊旁邊,經理們行出行入最鍾意周圍「了解」下同事做緊咩。不過佢又厲害,因為間唔中要幫手Quote價搞活動,可以大條道理包裝到係工作上需要同Supplier或者Workshop嘅老師傾野。

 

 

二家姐呢,以前比所有人嘅感覺都係好乖巧,可惜為埋堆上位就學埋阿大啲衰野。個人高頭大馬,但係就大肆宣揚自己要做經理指定幾個計數Add hoc project有幾辛苦,有幾不堪壓力。唔係盲嘅都知,佢同阿大喺Workload上根本就係我地部門最輕鬆果兩位,所謂Add hoc project都不過係幫最錫佢地嘅嗰位經理Draft兩、三個Report,Consolidate下啲Data,平時我地呢班同事每人每月Routine都做返十份八份啦,真係小毛見大毛。有同事報料話阿二個電腦永遠開住同一個Excel表,永遠見唔到有新Input,喺呢個煙幕下佢究竟係度做咩呢?當然係Join姊妹們Group chat講下隔離部門有咩高富帥搶手貨啦!圍威喂識下異性就係佢返工嘅意義,不過公事點都要睇落處理妥當,所以佢就出招令男上司為佢孭飛,成功嘅話基本上係可以打橫行。為咗增加吸引力,要出動迷你短裙,自己係女仔都忍唔住望多兩眼「欣賞」。小熊自問係保守黨,著裙都要著埋Legging免得露肉會害羞,完全行唔到呢種路線。

 

 

好啦,三家姐呢?佢班好姊妹就形容佢為最「仙氣」嘅一位,平時好安靜唔係點出聲,經常好弱不禁風咁披著厚厚嘅披肩同埋帶口罩。跟得上面兩位多呢,又有樣學樣開大個Dual mon 玩Group chat!好好彩,佢個男上司坐佢前面,起勢劈里啪啦嘅打字聲絕對呃得下人架,當上司一起身三家姐就立即醒水縮細返個畫面,然後繼續喺主Mon扮工,再好斯文地起身拎啲P file出嚟揭兩揭睇一睇又收返埋。

係咪好想知點解普通HR文員都有Dual mon用呢?公營機構舊機多,識得相關同事比少少甜頭人地,就好易話為架啦!唔知幾時開始,佢地仲有自家Dress code,一年四季一律係黑色、蕾絲、短裙,要用美色得返嚟嘅野,我就自問無呢方面嘅才能。佢地三姊妹好輕易各自都有,一個主Mon扮公事,另一個就做私事,嗱 …… 咁咪係Work life balance!

 

 

大家姐好清楚呢度嘅玩法,所以點解咁多「姊妹」係有原因嘅。做文員嘅,唔需要高學歷,唔需要好勤力,之但係一定要識撈又要表現得楚楚可憐,用盡人地嘅側隱之心去逗呢份薪高糧準嘅筍工!

回應 (0)
我要發表
user