小朋友變身救火英雄
2017/08/07 14:30:22
網誌分類:
生活
| 天氣酷熱，消防員工作挑戰特別大。昨日係將軍澳百勝角路消防及救護學院嘅開放日，好多大人帶同細路仔去參觀消防設施，仲有滅火表演睇，有小朋友試穿消防員制服，雖然大汗疊細汗，但好多都話感受到消防叔叔嘅工作好辛苦喎，所以好支持佢哋勇敢撲火救人。 消防及救護學院昨天舉行開放日，市民拎住之前排隊領取嘅入場券入場，學院所有區域都開放俾公眾參觀，有用嚟訓練消防員處理指定事故嘅課室，包括坍塌搜救訓練場、飛機事故訓練場、加油站事故訓練場等，更加首次公開「百勝角港鐵站」，雖然唔係真嘅車站，不過入面造得好仔細㗎，有月台又有扶手電梯，只係造得比較迷你一啲，等大家知道消防員如何喺港鐵做拯救工作，Kelly都忍唔住自拍一番。 除咗參觀之外，亦有救援同滅火示範，學院特別派出高空拯救隊示範攀爬繩索，又派火警調查犬「森仔」示範嗅查能力，仲有消防員即席示範滅火，以及救援隊示範危害物質事故訓練、水上事故訓練，節目好豐富。當然唔少得大人小朋友都鍾意嘅攤位遊戲啦，好多人影完家庭照放上社交網站，話俾小朋友認識下消防同救護嘅專業，希望及早立志做個勇敢嘅撲火戰士咁話。 KellyChu |
 | |
| |
 | |
|
回應
(0)
我要發表