入場撐電競音樂節 林鄭追星睇SMTOWN 晒舉V合照!
2017/08/07 14:30:23
網誌分類:
生活
由香港旅遊發展局首次舉辦嘅「工銀亞洲香港電競音樂節」,電競比賽吸引好多鍾意打機嘅後生仔,而一眾韓國男女人氣歌星表演嘅音樂會,就吸引好多後生女入場,連呢排忙於外訪嘅特首林鄭月娥,亦特登入場,佢仲去埋後台同班韓國靚仔靚女玩Selfie留念。 林鄭早前官式訪問完新加坡同泰國,前晚佢以一身湖水綠清新外套,現身喺SMTOWNSpecialStageinHongKong嘅演唱會!紅爆全球嘅男子組合EXO、女子組合RedVelvet同埋SUPERJUNIOR等相繼出場,佢哋唱出動感澎湃嘅跳舞歌,以為好震撼,原來唔夠在場女粉絲嘅尖叫聲,佢哋聲嘶力竭,叫聲真係震耳欲聾,難得林鄭坐喺前排,非常享受,反映佢好想參與年輕人活動噃。 林鄭仲喺自己fb上載同旅發局主席林建岳、幾個韓國歌星嘅合照,林鄭企喺相嘅中間,做出V字手勢,笑容滿面,仲留言話:「好多謝您嚟香港表演!」仲有韓文翻譯。整個音樂節嘅演出氣氛熱烈,證明旅發局今次成功搞咗一次年輕人嘅盛事,相信會令好多後生仔女期待下年捲土重來。 KellyChu |
| |
|
回應
(0)
我要發表