副局長對本地教育有信心 蔡若蓮兩個仔都讀津校
2017/08/10 10:41:04
網誌分類:
生活
| 新一屆政府嘅副局長同政治助理，首批十一位昨日「大晒冷」，一起現身，同前線記者聚餐，其中最「惹火」嘅教育局副局長蔡若蓮，大爆佢兩名兒子都喺香港讀津貼學校，睇嚟佢對本地教育好有信心，唔會被人批評自己搞教育政策卻送子女去外國讀畫，真有政治智慧。另外，之前被記者問卻答唔出最低工資嘅勞福局副局長徐英偉就話，自己已經「溫書」，仲話了解政策理念同方向，先係最重要喎。 蔡若蓮面對記者時，大爆自己兩名兒子，都喺香港讀津校，大仔早年考AL，細仔考第一屆DSE，但細仔去到中四都唔識緊張，玩咗先算，令佢有啲擔心。佢又提到，屋企人好支持佢出任副局長，仲話會以平常心面對批評，做嘢認真啲、落力啲喎。 至於履新當日答唔出最低工資係幾多嘅徐英偉就話，自己事後有返去「溫書」，又話雖然自己來自建制陣營，但唔會同有泛民背景嘅局長羅致光分工，只向自己熟識的政黨做游說工作，仲「賣口乖」話自己好鍾意同泛民傾政策，因為對方提出好多新觀點。 符傳富趕收工為「前世情人」慶生 運輸及房屋局局長政治助理符傳富（Mark）話，返咗新工一星期，工作十分忙碌，每晚成九點先收工，上星期五更加班至晚上十一點。但佢笑笑口話，昨晚一定要早啲收工，同囡囡慶祝一歲生日。Mark咁錫自己嘅「前世情人」，就知道佢係一位「絕世好爸」啦！ KellyChu |
 | |
| |
 | |
|
回應
(0)
我要發表