有激光肥皂泡加入本地特色光影匯演再度閃躍維港

2017/08/12 10:11:06 網誌分類: 生活

12 Aug

        「閃躍維港」光影匯演又返嚟喇！旅發局由即日至九月二日，每晚會喺文化中心露天廣場進行全新嘅光影匯演，旅發局主席林建岳同商務及經濟發展局局長邱騰華昨晚一齊主持啟動儀式，Kelly見到個匯演啲光影色彩好繽紛，加埋激光、肥皂泡、煙霧等效果好夢幻啊！

        旅發局主席林建岳主持啟動儀式時話，光影匯演喺過去三年共吸引超過二百三十萬人次到場觀看，今次嘅匯演除咗有燈光效果同3D投影技術，仲首次加入咗多感官玩樂元素，希望可以吸引到更多遊客同市民欣賞咁話。

        今次匯演動畫片嘅故事係講一條開心活潑嘅巨龍，同雞年吉祥物同遊香港，畫面加入本地特色景點、地道美食同埋電競遊戲嘅元素，展現香港夏日多采多姿嘅旅遊樂趣，亦配合「工銀亞洲香港FUN享夏日禮」。片中多個角色，例如巨龍、雞蛋仔、菠蘿油、燒賣、叉燒包等，仲會「跳」出投影幕，化身LED塑像同大型充氣公仔同觀眾見面㗎！

        現場仲有「喚醒巨龍」互動遊戲，鐘樓會化身為巨型踏步機，市民可即場參加踏步比賽，鬥快「喚醒」水池中嘅巨型LED飛龍，而飛龍嘅多彩形象，亦會投影喺鐘樓上面。Kelly提提你，每晚都會有唔同形象嘅飛龍出現架，大家可以集齊一套十二款啊！

        KellyChu