休團在即10月開騷 C AllStar與歌迷開P
2017/08/28 08:41:17 網誌分類: 娛樂
| 男子組合「C AllStar」出道7年，成員陳健安（On仔）、吳崇銘（King）、梁釗峰（Andy）和何建曦（Jase）打算完成10月舉行的《生於C AllStar》演唱會、與歌迷開完Party，便會「休團」各自發展，向打碟、作曲、演戲、出書和音樂等不同範疇進發。雖然他們笑言是膽粗粗試吓，但我好欣賞年輕人勇於嘗試的勇氣。記得2002年我亦改變自己，由音樂轉型去拍電影，只要心裏有團火，必會成功。 C AllStar各人均有獨特的聲線和唱功，曾在街頭表演，並於二○一○年正式出道。不經不覺已踏入第7個年頭，現時他們正密鑼緊鼓準備10月20日在紅館舉行的兩場演唱會，他們打算演唱會圓滿結束後便會「休團」各自發展，究竟點解會有這樣的想法，他們坦言：「我哋都合作咗七年，正所謂『七年之癢』，夾得太耐，某程度上火花冇以前咁澎湃，所以大家都需要唞吓，各自做吓其他嘢搵啲新衝擊，然後再重新走番埋一齊。」 各人發展方向 C AllStar於二○一一年推出的歌《天梯》最為人熟悉，更奪得第33屆「十大中文金曲頒獎音樂會」十大金曲之一。但除了唱歌，他們最想向哪一方面發展呢？ 釗峰表示：「我係好鍾意音樂，但我發覺做音樂同做真正歌手有啲唔同，以前以團隊為主，但做組合做得太耐有時會忘記咗自己，嚟緊我想搵番8年前自己鍾意啲咩音樂，再試多啲唔同嘅嘢，攞多啲經驗。」 阿King說：「我想試吓打碟做DJ，我覺得打碟好似開Party咁，等大家飲吓嘢忘記晒所有煩惱，一齊好開心咁跟住個音樂節奏，每當見到呢個畫面，我好有衝動成為台上嗰個人，同埋暫時未有人用廣東歌嚟打碟，我想開創呢個先河。」 On仔坦言：「未來發展我都係圍繞音樂，不過我想作多啲曲，可能作畀佢哋三個或其他歌手；另外我想喺唱功方面再發展吓，我發覺做演員去唱歌特別有感覺，所以我想試吓演戲，睇吓唱功會唔會有進步。」 Jase續說：「我都會以音樂優先，但有一樣嘢我更加想做，就係出書，我計劃緊出兩本書，一本係關於香港唔同嘅音樂，另一本係講東南亞旅遊區如東京、大阪嘅美食，我會介紹當地大家未發掘到嘅美食。」 聽完他們未來的發展方向，真是各有理想，我非常欣賞，尤其是Jase出美食書，我好期待，因為我本身好鍾意食麵，曾自稱為「麵神」，希望他介紹多些好食的麵給我。 演唱會的特色 今年10月他們舉行名為《生於C AllStar》的演唱會，其實即是生於香港的意思，會講番他們出道這七年的故事。他們更透露演唱會Day 1和Day 2的Rundown是不同的，但主要都是唱自己的歌。阿King解釋：「曾有歌迷聽完我哋嘅演唱會，話我哋咁多歌，點解呢隻又冇唱，嗰隻又冇唱？」On仔續說：「係喇，其實我哋有好多歌都未唱過Live，所以今次可以同大家分享吓。」 他們過去唱過很多不同曲風的歌，所以今次演唱會有一個環節，會將不同曲風的歌編排在一起，他們唱得開心，觀眾又聽得過癮，不過On仔笑言：「真係考起我哋嘅音樂監製。」另外，剛才想做DJ打碟的阿King，在演唱會時也會率先用廣東歌重新Remix啲歌，與觀眾一齊開Party。他們均稱：「我哋做完演唱會後就會休團，所以呢兩場演唱會對我哋嚟講好珍貴，希望畀到大家一個美好嘅回憶。」 主持：黃柏高 統籌：林永匡 撰文：李佩儀 協力：彭保迦 攝影：袁東亮、謝民光 化妝：NanaWong 髮型：Zanki@iHair 形象：WillYu 場地：日熹樓 |
 | |
| |
 | |
| |
 | |
| |
 | |
 | |
| |
 | |
| |
 | |
| |
| |
 | |
| |
 | |
| |
 | |
| |
| |
回應 (1)
我要發表
PACO名人會 2017/08/28 12:19:49 回覆
