鄧永鏘最後派對酒店曝光

2017/09/01 08:41:04 網誌分類: 生活

01 Sep

        「香港最後貴族」鄧永鏘爵士周二晚離世，佢生前原本打算開一個「最後派對」，連日子都訂咗喺下周三，地點喺倫敦TheDorchesterHotel（多切斯特酒店）嘅宴會廳，可惜事與願違，一眾名流友好無不惋惜！Kelly去睇吓呢間酒店嘅資料，發現場面好典雅、高貴又華麗，皇夫菲臘親王都曾喺宴會廳搞婚前單身派對㗎！

        鄧永鏘原訂下周三晚上七至十點喺倫敦多切斯特酒店嘅宴會廳搞「最後派對」，等友好同佢面對面話別，唔好等佢去咗乜都聽唔到，真係好瀟灑，點知派對開唔成。小妹發現，酒店係五星級嘅豪華酒店，係倫敦最出名嘅宴會場地之一，於一九三一年開張，之後唔少英國皇室成員、多國政治領袖都係常客，例如英女皇伊利沙伯二世喺訂婚前一日就去到呢間酒店參加晚宴，丈夫菲臘親王仲喺呢間酒店搞婚前單身派對！

        佢嘅宴會廳超過一萬方呎，可容納五百人食晚餐、一千人享用雞尾酒，設有私人入口，夠晒私隱，仲有三間連私人衣帽間嘅接待區、貴賓室、金房、銀房等，非常高檔！宴會廳喺六年前復修過，回到上世紀三十年代嘅典雅風格。Kelly睇過啲相片，真係有貴族氣派。

        多切斯特酒店話，佢哋擁有世界上最美麗嘅十間客房，小妹見到房價由四百幾至五千四百歐羅都有，即係港幣四千幾蚊至五萬幾蚊啊！酒店入面設多間餐廳同酒吧，包括鄧永鏘開嘅「唐人館」，仲有一間米芝蓮三星級法國菜，唔怪得知鄧爵士想友好喺呢度送佢最後一程啦。

        KellyChu