回收箱亂塞垃圾 香港人質素露底
回收箱亂塞垃圾 香港人質素露底 
港府出晒名講就天下無敵，做就無能為力，好似垃圾分類回收吖，大大話話搞咗十幾廿年，不料人均垃圾量愈來愈多，分類回收就愈做愈縮，部分市民又欠缺公德心，香港搞環保一事無成，就係咁解。
嗱，有環保團體針對銅鑼灣、旺角、尖沙咀等十四個旺區二十三個路邊四合一回收箱進行調查，結果嚇人一跳，逾一千三百件回收物之中，只有五百多件被正確棄置，比率只有三成八；另外，逾兩成七為骯髒回收物，例如飲完嘅珍珠奶茶膠杯未經清洗就被棄置；逾一成七屬錯誤分類，更有一成六屬於垃圾，當中包括痰涎等穢物，問你點頂。咁仲唔止，調查仲發現近七成回收箱欠妥善管理，被人塗鴉有之、貼街招有之，仲有逾半回收箱外堆滿垃圾，睇見都眼冤。
所以話啫，香港搞環保寸步難行，罪魁禍首梗係講多做少嘅特區政府啦，所謂回收分類政策，來來去去都係「藍廢紙，黃鋁罐，啡膠樽」呢啲假大空口號，既冇加強教育及宣傳，更冇全面嘅回收配套配合，加上內地近年拒收多種固體廢物，回收物少咗出路咯喎，回收商冇啖好食，自然唔願意投資及發展。呢，曾有傳媒直擊回收商收走回收物後直接運往堆填區，港府搞環保有幾失敗，呢啲咪係證據囉。
咁當然，市民本身唔自律，冇公德心，亦係回收失敗嘅一大「死因」。唔少香港人平時擺出高人一等嘅態度，批評呢個，踩低嗰個，其實五十步笑百步，否則回收箱又點會被人當成垃圾崗吖，又點會有人夠膽死喺回收箱放飛劍吖。再講，垃圾回收唔止淨係分門別類咁簡單，回收前仲要進行處理，好似汽水罐、洗頭水樽咁，唔洗乾淨就塞入回收箱，分分鐘污染埋其他有價值嘅回收物，盞嘥氣嘅咋。
睇到喇，垃圾分類及回收呢啲咁簡單嘅事，台灣做得到，南韓做得到，日本做得到，偏偏香港搞到一鑊泡，人均垃圾量仲要冠絕全球，簡直唔知醜字點寫。港府即將實施垃圾徵費計劃，話咩寓禁於徵，用者自付喎，講就容易咯，以港府搞環保只有三分鐘熱度觀之，以港人公德心低下觀之，係咪真係可以十年減廢四成，令人疑問，環保團體建議港府減少路邊回收箱及垃圾桶數量，等市民唔可以隨處棄置垃圾，唔係冇得諗(o羅)。
咁講啦，有人嘅地方就有垃圾，香港地少人多，再唔諗計減少廢物，唔止堆填區爆滿，遲早垃圾圍城。講到尾，環保唔係靠把口，大家都要行多一步，出多分力，最重要係消費前停一停、諗一諗，咪做大嘥鬼吖！
功夫茶
http://orientaldaily.on.cc/cnt/news/20170901/00190_001.html