《星島》獨家戴妃泳照 轟動一時
2017/09/02 08:41:09
網誌分類:
生活
Kelly搵番當年嘅《星島晚報》頭版睇睇，標題寫住「添馬艦泳池驚艷，戴妃作出水芙蓉」，幾張相見到身穿鮮紅色一件頭泳衣嘅戴妃悠然自得游背泳，同埋上水一刻，轟動全球媒體，仲爭相洽購版權?。
吳紹榮同小妹講，當年一早租咗富麗華酒店房間，可以望到停泊喺維港嘅皇家遊艇「不列顛尼亞號」，而皇儲伉儷都住在船上，成班同事二十四小時監視住船上嘅一舉一動。吳紹榮當時負責夜班，原先都諗住冇嘢影，點知到天光時候，居然見到戴妃行出遊艇，去咗添馬艦泳池游水，即刻舉機狂影！唔知係咪畀人發現咗，戴妃游咗一陣就上水走咗喇。
不過佢話當年攝影器材嘅質素冇咁好，加上酒店同泳池嘅距離實在太遠，唯有用支焦距300mm嘅長鏡頭盡影。佢仲話當年係用菲林，影完即刻就叫同事幫手將菲林車返公司曬出嚟睇，佢話當時嘅心情都有啲緊張，真係未到最後一刻都唔知影唔影到㗎嘛。佢好謙虛話，其實輯相嘅效果唔係好理想，但叫做影到，不過全世界得佢影到咁珍貴嘅一刻，佢都話有少少開心㗎！
KellyChu
回應
(0)
我要發表