幾忙都支持演藝文化活動！港樂俄羅斯之夜林鄭上台打氣

2017/09/04 08:41:11 網誌分類: 生活

04 Sep

        特首林鄭月娥工作忙碌，但佢仍然身體力行，支持本港嘅演藝文化活動。Kelly經常去大會堂同文化中心睇演藝節目，周不時見到佢嘅身影，好似前晚香港管弦樂團新樂季揭幕音樂會，林鄭仲特登喺中場休息時段走上台，為指揮家大師同一眾樂手打氣，真係有心。

        香港管弦樂團新樂季喺上周五、周六正式揭幕，搵嚟琴藝超卓嘅鋼琴巨星王羽佳，演出柴可夫斯基最受歡迎嘅《第一鋼琴協奏曲》。王羽佳出生於北京，係現時技術最精湛、琴音最美妙、最性感嘅鋼琴家，大名鼎鼎，喺全世界有好多粉絲㗎！而梵志登就係樂團嘅音樂總監，佢指揮樂團演奏史特拉汶斯基嘅《春之祭》，首歌狂野奔放，小妹覺得好震撼！

        佢哋呈獻咗一個好難忘嘅俄羅斯之夜，全場觀眾都好陶醉，林鄭亦喺中場後走咗上台，為佢哋打氣，全場鼓掌致敬！近排林鄭去親睇表演，都鍾意去後台同表演者合照，好似佢喺七月中同白雪仙一齊睇《蝶影紅梨記》，八月頭去咗電競音樂節撐韓國潮流組合SMTOWN演唱會，八月中又去欣賞許冠傑同譚詠麟嘅演唱會，今次佢仲走上港樂嘅演出台，認真畀面啊！遲啲西九文化區愈嚟愈多活動，相信林鄭一定大力推動，令香港文化更加多元！

        KellyChu