爆料：臭虹與電梯男的故事

這個Blog，有一個角色，多見其名未見其影，偶爾又會用「後藤貓美子」之名上來嗡三嗡四，臭虹是也！她是我的鬥嘴對手，也是我和我老婆的多年好友，更是我結婚時我老婆的伴娘，為人癲癲喪喪，大情大性，但卻以真心待人，是一個爽朗的傻婆，正是愈吵愈friend那種。

話說，多年單身而又三張野的臭虹，一直聲稱自己唔恨嫁，早已搵定灶罅去攝……我還算她的知心友，知她其實口話唔恨，實質好鬼恨。三番四次想介紹一些好男仔給她，奈何香港女多男少，加上我本身條件太好，眼角比她自己還要高，真是想介紹也無從介紹起。身邊的單身漢之中，最好果件居然係肥sun，無謂咯～～

有天，她說有人追她。那男的是電梯技工，對部lift多過對人，tu tu地，口才完全唔掂，直情係一件電車男，所以我幫佢起左個花名，就叫「電梯男」。雖然係咁，但正如《電車男》故事一樣，呢挺毒男有個好大既好處，就係夠晒細心兼且心地純良，好岩現在的臭虹。有次她帶電梯男來gathering，看他對答，看他行為，看他眼神，確是未經琢磨的玉石是也！但多年單身的臭虹，竟唱起「不敢試愛」來。作為朋友，我好歹也要助他們一把。

「點呀，點呀，我應該點呀？」
「咪去馬咯！」
「但我又怕佢唔岩我喎，你知我架啦，平日玩得好癲架嘛，佢比較……」

妳居然嫌人tu…… 

「之前咪有另一個人追妳既？」
「果個唔得！佢成日口花花，冇安全感。」
「咁呢個電梯男咪夠晒安全感咯！」
「咁又係～～但……但我又唔知好唔好喎，你知我好耐冇拍拖，好驚……」
「一句到尾，咁到底妳對佢有冇feel先？」
「都有既……但又好似未去到果種……果種，即係，你知，即係，果種……」講完一大輪……佢又話：「其實我都好容易鍾意一個人既～」

妖～～～～！

「不如咁喇！畀個建議妳……」

各位觀眾，一個老套到震又萬試萬靈既idea黎喇！

「畀三個月probation佢啦！同佢講明，呢三個月內試下拍拖，但講明期間唔會『咩野』，過左三個月再睇下到時妳同佢夾唔夾咯！」
「咦？good idea喎！」

唉……真係橋唔怕舊，最緊要受。而最搞野既係：Probation呢條橋，通常係男仔媾女時用既，試用左三個月，最後實係繼續落去。我提得出呢條橋，只係幫個男仔一把。

如今，三個月都好似過左lu……情人節，電梯男帶她去九龍酒店食buffet，算係咁啦！遲d臭虹仲要帶佢番中山見親戚，老婆話：「睇佢地個勢，應該好快結婚！」嘩，有冇快成咁呀又……乜真係咁趕咩？