優質食品源頭追蹤計劃 21企業獲表揚

2017/09/07 08:41:05 網誌分類: 生活

07 Sep

        食物除咗要好食，安全好重要，Kelly見到香港貨品編碼協會搞咗個食品安全論壇兼「優質食品源頭追蹤計劃」頒獎典禮，有二十一間企業獲表揚！佢哋仲推出全新嘅微信條碼掃描功能，等大家掃一掃條碼，即刻睇到產品資訊啊！

        食品安全論壇搵嚟食衞局副局長徐德義做嘉賓，佢話香港係美食天堂，而當局好關心安全同質素㗎！香港貨品編碼協會就再次舉辦「優質食品源頭追蹤計劃」，嘉許咗二十一間企業，表揚佢哋喺食品安全、實踐可追溯性都有傑出表現，其中鑽石獎由美心食品、捷榮咖啡、維他奶、太古可口可樂同合興食油奪得，另外仲有金獎同銀獎。

        協會又推出全新嘅微信條碼掃描功能，只要用微信掃一掃貨品上面嘅條碼，就會連去嗰件產品嘅資料網頁，例如有圖片、簡介，等大家更加了解產品資訊，咁就可以安心選購產品啦！啲資料係由喺貨品編碼協會註冊咗嘅品牌自己提供，可信又準確！

        KellyChu