《分個豬肉獎等你開心下？》

一間有規模嘅公司每年都會搵顧問公司幫手做大型內部Research，了解員工對公司嘅意見，從而諗方法提升公司嘅人才發展同績效管理。HR部門就當然係擔當其中一個重要角色，密密做一系列嘅活動呼籲同事去參與。當管理層傾好晒方針，我地就要Plan點樣喺特定時間內同顧問公司夾好，佢地從旁睇到實一實，監察我地推出一啲問卷調查和實地考察嘅Function，確保個結果係真實嘅，由我地嘅汗水之中得出嚟嘅！

地獄式嘅OT玩咗足足兩個月，我地HR嘅小薯輪流Take up唔同日子嘅Job，落Site完咗成日活動唔好諗住有得早走一個半個鐘，未夠鐘收工都要返Office起埋啲Report啊！再陸續交比顧問公司幫手做分析，睇吓究竟員工對公司嘅滿意度有幾高呢。嘿嘿，其實我都好期待同事會唔會夠膽表達心入面嘅諗法，令我地嘅工作係有意義地付出咗。

結果出爐啦！我地老細捉晒全部HR同事入大房開會。老細好快指出較嚴峻嘅情況係年輕一代嘅員工將近八成表示工作唔愉快，得唔到適當嘅支援，所以流失率相對地高。我地呢啲小薯好認同呢個結果，老Seafood太多，Perm咗趕唔走。由於佢地要Keep住Hea，但都總要有啲「渣拿」，所以唔肯主動教下屬，啲Task得過且過做咗就算，有鑊咪懶落啲細嘅度。下面嘅幾努力都好，見有啲管理層嘅老Seafood一有空缺就派親信入嚟，空降Head住自己，自己點都無機會升上去，唔甘心到一個點就會決然遞信。

為咗提升所謂士氣，上層決定要我地搞一個頒獎典禮去「表揚」一吓出眾嘅年輕嘅同事。大家立即面有難色保持沉默，心諗又嚟一次地獄式OT，真係怕怕。雖然只係初部建議，不過強調頒獎比年輕嘅同事唔驚會觸發年齡歧視咩？仲有啊，一班老Seafood一定會好不滿出嚟搞搞震，到時為咗安撫佢地唔通又刻意搞另一個頒獎典禮？大家滿頭問號之際，老細已經講到眉飛色舞，「每個部門都設定三個傑出獎項，再加新人獎，仲有係友誼先生或小姐獎項！我地要做多啲宣傳通知每個部門主管要Nominate多幾位同事出嚟選，咁先夠熱鬧嘛！可以諗下使唔使整多啲海報同橫額貼喺電梯同大堂。到時頒獎當日要製造多啲氣氛，大老細會落嚟睇架，預備定一大堆打氣小工具派比所有入場同事，我地搵啲Helper企喺附近做歡樂先生和小姐帶動吓氣氛起哄啊！」老細，其實你做咗咁多年HR，唔會認真覺得搞一次呢啲活動就可以得回人心吧！

作為「年輕同事」嘅一份子，真係選中我都唔會特別增加對公司歸屬感，大家亦會好快忘記邊個係得獎者。自High舉辦完一次大花人力物力嘅活動，HR同事嘅怨念應該迅速飆升！咁又點計先？