PACO名人會
PACO名人會
PACO名人會

同劉德華攜手《追龍》 甄子丹:演反派跛豪好大挑戰

2017/09/18 08:41:22 網誌分類: 娛樂
18 Sep

        十‧一國慶將至,本月尾將有一部萬眾期待的新片上映,電影《追龍》改編自真人真事,由兩大巨星劉德華和甄子丹首度攜手合作。華仔重演其經典角色五億探長雷洛;丹爺則扮演大毒梟跛豪。重拍當年經典不容有失,丹爺為演活潮州怒漢「跛豪」,落足心機苦練潮州話三個月,外形上亦有「加工」,破格演出。近年係正義代表的丹爺坦言同華仔合作有如「圓夢」,而演反派有機會跳出框框,他說:「拍呢部戲好大挑戰,亦覺得有使命感去做。」兩巨星演技大格鬥,一定要捧場!

        91年曾監製電影《五億探長雷洛傳》及《五億探長雷洛傳II之父子情仇》的王晶,當年兩片累計大收5,300萬,華仔飾演的雷洛霸氣十足,成經典角色。對《雷洛傳》深存情意結的晶哥,兩、三年前着手籌拍《追龍》,仲大膽搵來好友華仔拍宇宙最強。在新片擔任監製及導演的晶哥說:「當年《雷洛傳》無乜筆墨講跛豪,但兩個梟雄人物處身同一時空,無可能無精采交雜。但如果要拍,一定要搵兩個超級巨星擺埋一齊,觀眾先會有入場嘅欲望。當然我先搵子丹,因為熟啲,答案yesorno,一等就幾個月。戲中另一個強對手,搵華仔係不二之選,當年約30歲嘅華仔都成功演到50歲啦!我搵佢(華仔)時,佢有少少卻步,但華仔對雷洛一角都有情意結,甄生配華仔,好有新鮮感。事實今次華仔演出,對佢嚟講舉重若輕,唔使chok都覺得佢靚(仔)。」

        只演一次狠角色

        近年憑《葉問》系列奠定正派形象的丹爺,接拍《追龍》時亦曾有過掙扎,糾結幾個月才答應演出。丹爺說:「同晶哥識咗好多年,今次都係首次演佢導演嘅戲。年前,晶哥畀咗兩份劇本我揀,其中一個要我演跛豪,個心離一離。自己拍戲有自己嘅原則和理念,唔係話抗拒演反派,我都演過。因為呢部戲係改編真人真事,又係反面教材人物,對動作演員嚟講係好大挑戰,亦有機會跳出(葉問)框框,覺得有使命感去做。加上晶哥好有誠意,兩年前,我喺多倫多拍緊《3X反恐暴族:重火力回歸》時,專登飛過嚟搵我傾。咁我亦覺得作為演員可以豁出去,但只係會演一次咁激嘅角色。」

        「同華仔一樣要求高」

        首次同華仔合作,丹爺與華仔為保證高質素,齊齊撈埋監製一職,他興奮謂:「好期待同華仔合作,加上呢種片種和角色,晶哥加華仔二人駕輕就熟,有太多經驗和心得。如果我拍梗係同佢哋兩個合作啦!而圈中我同華仔出名係認真、執着和要求高,兩個人合作會有新鮮感。應承拍後,就想塑造一個全新嘅『跛豪』出嚟,撇開91年,由麥當雄編劇兼任出品人嘅版本,當年我老死呂良偉增肥演出咁經典,我要諗唔同角度。其實真人(跛豪)係瘦㗎!又無乜頭髮,新片嘅橋段、包裝完全係兩回事。」

        為演活潮州怒漢「跛豪」,丹爺除研究潮州人的容貌,發覺潮州人大多是嘴厚鼻大,拍攝時遂每日花3小時特技化妝「變臉」,事前亦聘請教授貼身學,對演出一絲不苟。丹爺說:「潮州話好難學,早前我喺外地補緊《星戰》戲,特登喺香港請個潮州話教授飛去倫敦,24小時喺耳邊用潮州話轟炸。拍攝時又請埋個教授喺現場執,仲迫埋劉浩龍和黑仔(姜皓文)學,亢喻就唔使啦,咁先可以入型入格做潮州幫嘛!」新片製作認真,演員又用心演出,預祝國慶檔大收!

主持︰黃柏高
統籌︰林永匡
攝影︰袁東亮
協力︰林書鉉
甄子丹化妝及髮型︰諺瞳‧小白、JackyLeung@ILColpoPP
場地︰皇御園(電話︰31882153)   
 
■王晶導演誠意打動甄子丹演出新片《追龍》,戲中丹爺在外形上落足心機,表現脫胎換骨。
■王晶導演誠意打動甄子丹演出新片《追龍》,戲中丹爺在外形上落足心機,表現脫胎換骨。
■電影《追龍》講述劉德華(右)飾演的探長雷洛,扶持甄子丹飾演的阿豪爬上黑幫大佬之位,兩位好兄弟統領黑白兩道,互相成長同時又互相制衡。
■電影《追龍》講述劉德華(右)飾演的探長雷洛,扶持甄子丹飾演的阿豪爬上黑幫大佬之位,兩位好兄弟統領黑白兩道,互相成長同時又互相制衡。
■子丹坦言拍得好開心,大讚劇組上下一心,好為部戲去努力。
■子丹坦言拍得好開心,大讚劇組上下一心,好為部戲去努力。
 
■子丹直言今次是最後一次演反派角色,因為太入戲,要抽離不容易,非常痛苦。
■子丹直言今次是最後一次演反派角色,因為太入戲,要抽離不容易,非常痛苦。
■戲中,子丹(右二)和(左起)劉浩龍、亢喻和姜皓文的四人潮州幫,打出天下。
■戲中,子丹(右二)和(左起)劉浩龍、亢喻和姜皓文的四人潮州幫,打出天下。
■子丹研究過潮州人的容貌,認為嘴厚鼻大先似。
■子丹研究過潮州人的容貌,認為嘴厚鼻大先似。
 
■來自美國的特效化妝師,日日花3小時,把甄子丹的鼻和嘴化得更粗豪。
■來自美國的特效化妝師,日日花3小時,把甄子丹的鼻和嘴化得更粗豪。
回應 (0)
我要發表
user

最新回應

Brian Chui
Brian Chui 2020/11/09

做得呢行,其實要食得好,先可以以更好嘅面貌示人,真係好admire你地成日有得係九龍城美食及餐廳指南入面揾到食啊

srinivas
srinivas 2020/10/19

Thanks for the best and i love it.

ghd sports

2020/10/11
islamicnuskhe
islamicnuskhe 2020/09/29

We Are Best Islamic Astrologer in The World with  35 Years of Experience. Solve Your All Life Problem With Us. Contact Our Molana Asif Ali Khan.