入行10年首開紅館騷 陳柏宇:想表達親切感覺
07年正式出道的Jason陳柏宇,花了10年努力終在今年12月2日及3日舉行首個紅館騷《陳柏宇Speechless演唱會2017》,雖然他謙虛話自己比起同期歌手懶惰,只是較幸運的一個,但相信機會永遠留給有準備的人,Jason這10年絕對不會沒付出過。而這個難得的第一次,Jason反而不想太showoff,只想向觀眾表達親切感覺,跟粉絲就像好朋友一樣齊齊玩番晚。
向來給人沒架子感覺的Jason,首個紅館騷也希望走親民路線,「我想表達一種親切感覺,我希望大家好似圍埋一齊睇電視咁,多於好有表演感覺嘅騷,我個人本身唔係好善於showoff,呢排就係構思緊點樣表達出嚟,或者可能好似外國睇球賽咁,有部KissCam,拍到嘅觀眾就要同身邊人錫錫,因為我好想除咗我同大家有互動之外,觀眾之間都可以有互動,會因為睇呢個騷成為朋友,好似有種好family嘅感覺一樣。」
想由心而發演唱
舞台設計採用四面台的Jason,預計以簡約為主不會有太多機關,「喺呢個樂壇,聽得最多除咗係多謝Paco之外,就係budget有限,所以應該唔會有太多機關,可能會安排Dancer佢哋扮嘢,譬如着住啲大廈或者車嘅衫。(有個動感啲感覺?)係呀!好似卡通啲,warm啲咁。」不過,Jason就講明自己不是郭富城,只會作有限度跳舞,「噚日出去做街訪,問大家想喺演唱會睇到啲咩?好多人都話想睇我跳舞,但係佢哋唔係要求我跳得好好,只要跳得開心就可以,所以高難度嗰啲都係留番畀Dancer做,但係開得四面台,我少不免都會走晒四隻角嘅。」
至於歌單方面,Jason仍在頭痛當中,因歌迷通常想聽舊歌,但自己卻想演繹更多新歌,「相信早期鍾意陳柏宇嘅fans,都會想聽到《車匙》、《你瞞我瞞》同埋《別來無恙》嗰啲,但自己想唱啲比較比較新嘅歌,因為舊歌多數圍繞愛情,題材同思維模式係比較慘,但係我本身其實唔係咁嘅人嚟,所以自己想唱多啲近期比較貼近我心聲嘅歌,好想由心而發去演繹畀大家聽。我諗最終係一半舊一半新咁啦!」
主持:黃柏高 統籌:林永匡 協力:杜淑霞 攝影:袁東亮、謝民光 場地:PalcoRistorante(26188383) | ||||||||||||
■Jason很感激Paco邀請訪問並給予鼓勵。 | ||||||||||||
■去年Jason在九展舉行音樂會,公司已有計劃為他搞紅館騷。 | ||||||||||||
|