世界輪流轉

無懼食兼扐

只怕你唔識

今時非往日

點到你招即

話說一名大影細國嘅煲手黨議員在本城機場被拒入境、使得影國外交部呱呱叫要大圈解釋喎！殊不知、大圈外交部派出一名滋陰補腎型嘅女士出嚟、滋滋油油咁回應謂、是否批准外國人入境、係大圈嘅主權、無須要解釋嘅喎！嗱、大圈食住個勢捩手給影國佬來一記兜巴扯面、咪話摑得佢唔爽。須知到今日世界已經變咗、大影細國再唔係舊時嘅甚麼月不上細國、而係欠人周身債嘅孭數細國嚟。早前佢哋嘅事頭婆唔係要紆尊降貴咁走出嚟迎接大圈嗰位冇禮貌嘅財神爺嘅咩？邊個叫影國佬咁鬼唔自量、呢頭𠸎大圈簽完千億大單、嗰頭就去掹靚國佬衫尾、仲答應接手搞到男海來橫行？今次居然仲唔知衰、打響個銅鑼話明要入罪惡城見班反派、妄想趁着大圈召開未來報告大會期間在本城贈㷫、咁咪擺假嚟丟囉！

講開又講、影國佬𧨾大圈落疊兼開水喉嘅時候、連托塔都應承。當合同到手之後就反轉豬肚、跟靚國攜手唱衰罪惡城、又嘗試拉攏男海嘅影聯邦國家聯手對付大圈。試問班老番仲係抱住呢套冷戰思維唔放、又點能夠有可能與大圈共同合作創造未來？今日老番盛極而衰已是不爭事實、而且仲係唔知到自已衰响邊度嗰吓弊吖嘛！反觀大圈自立國之始便嘗盡白眼和西方製裁、甚至連交易都係在不平等待遇之下進行、但龍的傳人勝在不信邪、不認命、結果經過三十多年韜光養晦之後、形勢便逆轉過來。今日嘅大圈正在朝向康莊大道而走、而且正藉如日中天、但番邦嘅勢頭猶如江河日下、一日陰乾過一日！難怪佢哋對崛起中嘅大圈既愛且恨啦！記得大圈在第十八屆茶聚時、預算將工藝水平提升至與架仔和南寒仔同一水平線之上、而在五年後嘅第十九屆茶聚、大圈將會宣布把工藝水平跟得意至睇齊。在咁情形下、如果我係老番、都會擔心優勢全失嘅。睇嚟、還是得意至和落難中嘅沙鵝比較務實、願意跟大圈在對等情況下、加強彼此之間嘅科技和其它方面嘅合作。然而靚國卻食古不化、咁就連個天都幫佢唔到喇！