31/10反彈在望

2017/10/31 20:07:18 網誌分類: 經濟

31 Oct

港股連跌兩日.低開低收呈陰燭.大舉屠牛.每月開新局首日例升.反彈在望

31/10 周二恒指收報28245, 跌90點(最多下跌152點, 一度上升18點)

國指收報11507, 跌55點(最多下跌100點), 國指跑輸恒指

由5月起的升浪, 恒指的慣性走勢係只會跌一周即彈, 上周跌左, 本周就會收升, 即係本周五會在28438樓上收市, 明日好友就會出手推升

本周波幅: 28183(低位) + 400~600點周波幅 = 28583~28783 (前頂28798)

明日係11月開新局, 反彈在望(燈神看淡明日的相反指標), 因為按照慣性走勢好友會在每月第一天出手, 大市收升居多, 加上今日尾市淡友偷襲推低收28245, 反而擴大了上升空間, 低位亦會吸引買盤進場, 28400樓上有熊熊, 明日大鱷就更加要上攻, 周二三(31/10~1/11)聯儲局議息前好友亦會推高大市來預留回調水位, 其實今日低收係好事, 10月收得低, 反而降低下月收升的門檻

昨日恒指收市U盤跌42點, 今日收市U盤大跌70點, 好少見咁大跌幅, 而且該時段成交亦明顯增加, 淡友連續兩日都係收市U盤偷襲, 呢個時段係唔係大媽已經收左工? 淡友唔敢同好友大媽正面交鋒就玩黑箱作業,

上証綜指先低後高, 單日轉向, 收3393, 升3點, 以接近全日高位收市, 上升股份比例非常非常高, 明日有望續升, 受惠國債息率上漲及炒養老金入市, 內險A股急升, 但內銀A急跌, 內銀H回氣, 據報內銀房貸額度吃緊, 北京多家銀行稱「全年額度用完」, 券商A股亦普遍跌逾1%, 內險當炒, 有助推動港股作出反彈, 內地10月官方製造業PMI由近五年半高位52.4，回落至51.6創三個月低位，遜預期, 如果一如財演分析所說十九大後內地股市會有一波行情, 只要消化3400魔咒位救市盤的沽壓, 上証早晚可上企3400大關

外資繼續丟A股, 滬股通(北向)連續兩日都出現資金凈流出, 內地股市雖然升幅不大, 但滬深兩市係升股大幅多過跌股, 表現唔錯, 只係內銀A急跌累街坊

本周開局連跌兩天, 淡友先奪得主導權, 但淡友唔會威得好耐, 按照慣性走勢, 上周恒指收跌, 本周就會收升, 即係周五(3/11)會上企28438樓上收, 今日港股收跌冇走雞, 但明天11月開新局, 第一天例升, 回顧過去10個月, 每月開局第一天係8升2跌, 即係明日升市機會大, 不過今次撞正破日啵! 幸好港股已連跌兩日, 已紓緩沽壓有利反彈

~~~~~~~~~~~~~~~~~~~~~~~~~~~~~~~~~~

月初先向28600進發

27/10(上周五)大媽大手掃貨, 推動港股急升, 但踏入本周大媽連續兩日都買少左, 資金凈流入縮水, 港股就連跌兩日, 分析港股根本係冇意思, 當大媽一掃貨, 港股就會有彈高吃, 一縮手港股就腳軟, 甚麼測市指標或圖表技術分析都失效, 港股升跌由大媽話事, 畸型的病態股市, 大媽只係用幾十億就將港股舞高弄低, 就算出現烏雲蓋頂大陰燭等利淡訊號都冇有怕, 只要大媽一掃貨港股就會急升, 港股真係有病, 我唔想花精神貼市就係呢個原因,

大媽買賣係冇路捉, 今日縮手甚至沽貨翌日亦可變臉掃貨, 大媽要月月創新高, 無論港股點跌, 都係拋離10及20天不遠, 要收復不難, 大牛市淡友真係唔好拗頸, 熊熊已下移, 唉! 大鱷一直唔肯落28000, 過去兩周不斷下試28100都守得住, BB熊卻不斷下移, 明益大鱷, 送熊入鱷口, 過去兩周沽空持續增加, 亦有挾淡誘因, 10月因為十九大俾阿爺阻頭阻勢, 未上29000, 就留番11月見啦! 普遍基金經理都認為今次的大媽牛市會升穿29000甚至30000大關

梁蛇數浪今次的大牛市長期升浪目標: 恒指10月高見28798, 突破了2015年4月高位28588, 長期升勢仍未有停止跡象, 梁蛇認為大方向會見31000~32527，(2007年10月高位31958)

~~~~~~~~~~~~~~~~~~~~~~~~~~~~~~~~~~

11月初先尋頂

明日港股開新局, 按照慣性走勢會先向上尋頂, 但月初見的高位未必係11月頂, 往後仍會有新高, 淡友想隊港股落山都要有利淡催化劑才能成事, 我估就算有利淡消息只能玩偷襲, 失驚無神插水來擴大月波幅, 急跌急彈, 不會在低位徘徊, 因為大媽見插會掃貨

今年9月埋單全月計收跌, 但9月的高位是在19/9出現, 唔係月初, 已打破了收跌月會在月初見頂的慣性走勢, 因為大媽一貫風格係唔會由月頭一路沽到月尾, 會係一面掃貨, 一面沽貨食糊, 目的係維持市場氣氛, 正正因為大媽呢種推高大市出貨的手法, 所以過去10個月每月都能創新高, 相信11月都唔例外, 會突破28798再創新高

去年收跌月多數係每月8號前見即月頂, 但今年9月雖然收跌, 不過係19號才見頂, 大媽牛市連慣性走勢都唔跟, 按此推算, 11月初會沖上28600再試頂, 到打回頭才尋底, 試完底又再沖頂, 總之就係28100~28600兩頭飆來擴大月波幅, 如能上企28600並向上突破企28800, 又要睇多500點, 即係見29300

今日大鱷殺左422張相對期指對沖張數牛證, 今個月合共殺了12420張, 剛好夠交數, 過去幾周大鱷一直守住28000皆因唔使插穿都食得飽, 梗係唔想破位啦! 今日大鱷隊一腳落去28183就超標食夠12000張交數, 冇必要再插啦!

大鱷月尾屠牛熊追數, 昨日屠熊, 今日屠牛, 好淡通殺, 昨晚美股下跌, 但昨日港股已經偷步跌左, 通常大市橫行跌幅不大代表好友健在, 拋離10及20天線不遠, 好友隨時會反擊, 要收復平均線不難, 熊熊已下移至28400, 上攻都有得開餐, 有大媽掃貨撐市做後盾, 好友一直咬住28000唔放, 力守50天線唔俾插, 看來11月初要先尋頂, 好友又要搵大媽幫手掃貨夾硬升喇!

港股牛氣沖天, 不斷破頂, 不得不佩服大媽的護盤能力, 9月見頂28248後收跌, 但10月仍能再創新高28798, 10月埋單恒指進一步大升691點, 係今年第四大升幅的月份, 國指仲勁, 10月大升598點, 創去年4月以來最大單月升幅, 相信冇乜圖表或技術分析測中吧! 大媽牛市, 技術指標可信度下降, 連出大陰燭都可以拗腰急升, 港股由北水話事, 升幾多都得, 總之見大跌就執定平貨博爆頂

特朗普將於11月8~10日首次訪華，預計將有約40家企業的代表參加隨行的貿易代表團，並與中國簽署數十億美元的投資協議, 人民幣突然止跌回升可能同狂人訪華有關

${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$ ${#icono_72}$ ${#icono_64}$