《Slash族—找回自己的人生》

人生本來就係有好多既可能性，放係工作上，反而變得不可行？

細細個被大人問:「你大個想做咩？」，答案點解永遠只得一個，大家只能一生做好一個最初set定既目標。人在成長，不斷有新既經歷，啟發更多未被發現既好奇性，目標因此而改變亦係自然不過既事。但為左家人既期望，伴侶祈求生活既穩定，只可以繼續躲係非人性化既束縛內，專心番一份朝九晚五安定既工作。

社會進步得緩慢，其中一個原因係出左黎社會工作既人，漸漸喪失主動學習其他事物既能力。斜槓青年可以係外國咁流行，有部分更加係full time既自由職業者，係社會鼓勵呢一種既學習模式，而唔係死鼓鼓一份工做到老死就稱得上係專業既極致。Slash族係依靠唔同既技能去賺取收入，而家資訊和科技發達，自學番一招半式唔難，令我地可以較易掌握到基本技能去彈性咁番幾份兼職賺錢之餘，更拓寬到眼界。對於僱主黎講，佢地可以係需要人手時就外判工作出去，省時費力，又唔需要俾額外既福利，慳到唔少固定支出。

做slash族，睇就好自由，有決心衝出黎都要做足事前準備，最concern既一定係經濟上既考慮。無左固定收入，至少要set條底線俾自己每月要賺到幾多錢去維持生計，可能仲要計算埋俾家用既需要。當可以自由咁安排時間，好容易會鬆散落黎，要重新學會去管理時間，唔好再做以往既窮忙族。無左直屬上司指點你，唔會再有同事長時間同你拍住上，所有決定同後果都要自己一力承擔。接既工作都係想做想學習既，心情暢快之餘要認真build up自己既branding，就同經營公司一樣，要顯示到你既實力，你既價值就會倍增。以前做又三十六唔做又三十六，好多task當交功課做完就算數。做左slash既話，今日同你一齊做slash既同路人或者請你既僱主，他朝可能有意想不到既合作，認識既每個人唔再只係萍水相逢。每日出門去接受新事物既刺激，即使節奏更加忙碌，你會發現唔再抱怨，而係想不斷發掘同爭取新既機會，將默默低頭既自己煥然一新。

打工仔話就話穩定，就算係大公司工作，分分鐘突然有一日被炒魷魚，問題未必在於你，但要面對既就只有你自己。如果當下懼怕唔能夠搵份相等既工作，就會變得一無所有，人生係咪就只能被動地受控制？

為左麵包，就算唔係做slash族，我地都唔可以咁單一只集中發展一方面既事。