第一艘郵輪在港命名巨型香檳撞「世界夢號」表祝福

2017/11/17 10:11:07 網誌分類: 生活

17 Nov

        星夢郵輪最新成員「世界夢號」將於今午喺啟德郵輪碼頭舉行命名儀式，成為第一艘喺香港命名嘅郵輪啦！Kelly八卦到，儀式中有一個「擲瓶禮」環節，把一瓶二十幾升嘅大香檳撞向船身，以代表對新船嘅祝福！

        今午舉行嘅世界夢號嘅命名儀式，將有唔少名人參與，Kelly八卦到，特首林鄭月娥、商務及經濟發展局局長邱騰華、旅遊發展局主席林建岳等名人會出席，而藝人卓韻芝、郵輪達人項明生等人都會到賀。

        命名儀式中有一個名為「擲瓶禮」嘅環節，會由雲頂香港主席兼行政總裁丹斯里林國泰嘅夫人、潘斯里黃可兒出任「世界夢號」郵輪教母，佢會將一瓶二十幾升嘅大香檳撞向船身，祝願新船順利航行！

        「世界夢號」十八層高，排水量達十五萬噸，共有一千六百八十六間房，可接載超過三千三百名旅客。房間中超過七成有專屬露台，更有超過一百間可連通客房，滿足大家庭同團體旅客嘅需要。船上餐飲應有盡有，仲有全球最大海上VRgamezone、六條水上滑梯，仲有豪華海底觀光器﹗

        新郵輪將推出三條航線，一條逢周五出發、三日兩夜嘅周末航次，喺海上巡遊。另外有兩條逢周日出發、六日五夜嘅長航線，一條去菲律賓馬尼拉同長灘島，另一條去越南胡志明市同芽莊，啱晒鍾意海上逍遙嘅朋友。

        KellyChu