小心「長停公主」到啦!

2017/11/28 08:58:37 網誌分類: 經濟

28 Nov

港股來一個監管風暴，證監會繼續出手打擊互相持股的問題股，曹貴子的康健(3886)被證監會勒令停牌，投資者蔡志明和曹貴子劃清界線，話自己也中招，曹貴子早前再向他借錢他不借給他，他最近已聯絡不到曹貴子，曹貴子今次玩完咁話。

蔡志明講到咁，曹貴子似乎都唔易翻身了。而股壇長毛早前點名的「謎網50」的50隻股票，曹貴子屬下公司交叉持股的佔了一大堆，看來證監會認真做嘢，還有此類股份會被停牌，一停可能變「長停公主」。另外好多炒股背後都係同一班人，包括部份熱炒的內房股都有同一班老細去炒作的手影，股民要小心啦，持股不唔對路就要斬啦。

週一美股個別發展，杜指第二日向上，微升0.1%，標普500指數接近平手離場。

零售股受到美國「黑色星期五」銷售成績理想帶動造好，標普零售股票基金（The SPDR S&P Retail ETF) 昨日一度升1.5%，尾市回順至0.3%，百貨公司股JC Penny及梅西百貨股價造好，分別分2.8%及0.7%。拖累大市的是能源股，標普500能源板塊跌報過1%，能源投資者等候俄羅斯對石油輸出國組織減產協議表態，油價回軟拖累油股。

近日紐約分析師提到點樣睇圖表去判定股市係真的升市還是假突破，值得分享。分析師認為股市圖表走勢可以睇成係一個犯罪現場的腳印，而這些腳印可以追蹤到基金經理和大戶買賣股票的動作。

他認為圖表很重要，因為股票走勢有一個自我實現的特性，而有些大的投資概念，往往是由圖表走勢所觸發。不過，分析師補充，最全面的方法還是要雙管齊下，就是同時小心分析股票的基本因素和其圖表走勢。

他認為一個好的技術分析是能夠搵到能夠幫助決定大市走向的一些指標，有很多股份其實受到股指期貨所帶動，美股的指標期貨是標普500指數期貨，港股就係恆指期貨。很多時候，技術分析會先開始比較個別股份圖表與整體大市圖表去判定其上升的合理性，這個技巧稱為「確認」。例如，如果杜指創新高，假若杜瓊斯指交通指數沒有同時創新高的話，大市的升勢很難持續。要交通指數確認杜指走勢，兩者能夠齊創新高，這個升市才算比較穩陣。

分析師認為，其他一些指數都要參考，這些指數包括銀行指數、房屋指數、半導體指數以及追蹤大型零售商的股票基金，當這些指數與杜指都向著同一方向前進，這樣的升市才會有持續性，這個時候，就不怕將所有注碼都放上枱面上。反之，如果大市向上，但大部分的指數都不是同步向上的話，這個升市可能是假的，不應該相信。分析師指出，不同步的情況曾在2008年金融海嘯發生前夕出現過。

在一個升市當中，股份的升跌數目，亦反映了大市升幅是否過於集中，他認為一個有不同類型的股份參與的升市，才是健康和較有持續性的升市。另外，股份創新高及創新低的比率，也值得留意。能夠進入創新高名單的股份，其實並不容易，任何股份能夠創新高，背後通常都有特別原因，例如生意做得分外好、屬於某個強勁板塊又或者與地緣政治力量推動有關，這些都值得留意。

分析師在的結論是，你可以不是一名技術分析師，但仍然需要知道圖表究竟在說些什麼，需要知道如何閱讀圖表背後的意義，才能夠發現這是一個真升市，還是假突破。

昨日恒指跌180點，上升股票462隻，佔比15.3%，下跌股票1046隻，佔比34.7%，下跌股票佔總成交61.5%，上升股票佔總成交12.5%，以單日計，昨日還是跌得比較「認真」，因為大市跌幅雖然只有0.6%，但下跌股份多佔成交大。

我們常說港股雖創新高，但升勢集中少數股份，不全面，不健康，其實背後的道理就如上面所述，指數雖然咁高，但如今仍未係一個全面升市，只是一個跟外圍炒的股市。

陸羽仁

回應 (8)

我要發表

animal666 2017/11/29 06:40:45 回覆

上市易做莊難
2017年11月29日

　　曹貴子醫生的康健(3886) 被停牌，呢間公司雖然市值唔大，但因為曹醫生算係股壇名人，所以喺市場都好多人八卦吓。

　　初步睇嚟，呢系公司出事，係因為帳目被證監會質疑，但在此之前，關連的多間公司曾經暴跌，據同曹醫生相熟嘅「玩具大王」蔡志明講，要醫番呢系嘢都要幾十億元，呢個對佢雖然唔係大數目，但唔想俾人誤會佢係同路中人，所以唔會出手。

　　有中環茶友聽到話做莊做到要成幾十億贖身，大嘆今時今日做莊唔容易。

　　借名做餐廳都可招股

　　曹系股票出事，簡單嚟講係多間公司互相持股，股價炒高但派唔到出去，後來「股壇長毛」David Webb於5月發表的「50隻不能持有的港股」名單，踢爆呢啲公司流通量唔夠，互相持股，問題好大。股壇長毛一出招，觸發被點名股份其後大跌，喺嗰次「粉塵大爆炸」中，其中一班最傷嘅人係莊家同公司大股東好似曹貴子。

　　莊家做莊都係想炒高沽畀散戶，自己從中獲利，點解喺粉塵大爆炸中會咁傷呢？皆因依家市場內嘅小股民有兩類，一種係越境而嚟嘅大媽，佢哋炒股有佢哋嘅至愛，基本上對圍炒嘅本地莊家股興趣唔大；另一類係經驗豐富嘅本地散戶，佢哋咁多年已經見過晒莊家向下炒，又合併又供股玩法，個個好醒目，唔係咁易野生捕獲佢哋，莊家炒高出唔切貨，喺高位唯有互相交波頂住先，結果畀股壇長毛一個深水炸彈，就炸到五勞七傷。

　　本地散戶炒到精甩辮，而且今時唔同往日，過去公司上市唔易，有隻殼賣嚟賣去始終值番咁上下錢。現時港交所大開方便之門，公司上市多到你眼花，好似啱啱有間創業板公司叫1957 & Co.(8495) 招緊股。佢個名咁刁鑽，究竟做乜生意呢？原來係開餐廳，其中一間係啱啱喺海運大廈新擴建部份開咗間PAPER MOON。呢間餐廳喺米蘭都幾有名，茶友喺意大利食過，喺香港開業亦幫襯過，佢見過公司CEO郭生，知道呢間PAPER MOON其實係1957 & Co.獲授權開設。

　　1957 & Co.打開門開咗11間餐廳，其中有幾間係自家品牌，有幾間係授權，去年當中有間無錢賺，所以未來生意要睇人流多的商場是否肯租場，同時又要睇授權店舖有無得繼續借名經營。據公司講去年賺咗六百幾萬，雖然公司數據睇嚟有啲薄弱，但茶友話，佢上創業板散戶一樣可以認購，呢啲公司有散戶會博佢上市炒一浸，得就固然好，唔得就止蝕，總好過俾人又合又供，輸完仲要贖身。

　　微塵股被人插多刀

　　聽完茶友一番話，陸羽仁感覺就係，以前上市難，做莊揸住啲股票，點都有啲渣拿，o依家港交所要做多啲生意，狂開上市方便之門，股票供應咁多，做莊家都要小心翻艇。好似曹醫生間公司被人停牌，昨日都搞到嗰「50隻不能持有的港股」名單中，有多隻股份受壓，康宏環球(1019) 跌11%收報0.184元；香港教育國際(1082) 收跌15%報0.52元；智易控股(8100) 跌10%，收報0.43元，揸咗貨者如同畀人插多兩刀。

　　微塵股無運行，大市喺有傳中央開始堵截北水南下，跌幅曾擴大至351點，見全日低位29334；不過，在臨近收市前一小時A股發力回升，港股跌勢至大幅收窄，恒指收報29680，微跌5點。國企指數收報11705，下滑66點，成交金額1189億元。連跌4個交易日的騰訊，中午收市仍跌2.2%，但臨近尾市突然有大量買盤追捧，令騰訊拗腰收升1.9%報419.2元，貢獻恒指68點升幅，再度變成跌市下的擎天柱。

　　陸羽仁

2017/11/28 17:02:31 回覆

牛證太多...