梁家權
梁家權
梁家權

趕頭趕命打邊爐

2008/02/22 00:00:00 網誌分類: 寫作
22 Feb
侍應不斷推介澳洲的A3級和牛,我都不為所動,並非介意它不夠頂級,也不是它非原產日本,而是我一直覺得,打邊爐吃和牛,完全是搭錯線!不是怕霜降和牛出油太甚,而是和牛本身肉味較寡,以偏清淡湯底汋,根本不是味兒。吃和牛,我寧願吃少幾次,慳來的錢一次過找最頂級來自日本的貨色,以烤或煎至五至七成熟,灑點海鹽來吃,最能吃到入口即化的滋味。

    於是侍應又落力細數美國安格斯牛肉,美國牛肉的確比和牛更好肉味,但價錢不便宜,且都是冰鮮貨。打邊爐,最佳選擇一定是本地肥牛,無論肉味和口感,更勝美國牛肉,價錢也相宜一點。

    打邊爐材料五花八門,湯底也愈來愈古靈精怪,連飲品也多到不知如何取捨。不過,除非閣下戒吃牛肉,否則牛肉始終是「膽」,而且吃一碟是不夠的,也可以由牛的橫隔膜,吃至牛肩,三四碟乃等閒事。奈何打邊爐的限制愈來愈多,想慢慢歎,難矣!

   很多火鍋店只有兩個選擇,一係八點半前交枱,否則九點後才來。旺場的食肆都立下這條規矩,事先講明,願者上釣,其實很公道。一般打工仔若能七點鐘便成為座上客,已很幸福了,連點菜打牙骹享受佳餚,不足兩個小時,吃普通中菜或簡單西餐勉強還可以,但打邊爐就相當辛苦。

   即使把整碟鯪魚球蝦丸倒落鍋內一次過烚熟,而且不停手的汋牛肉淥桂花蚌,但牙骹也不能在一個半小時內不斷開開合合。

   須知打邊爐吃的份量不少,不攤長兩、三小時吃,對腸胃是一種折磨。是的,打邊爐毋須吃得優雅,但絕對需要時間,一定要人多,一邊吃一邊大談城中八卦,嘻嘻哈哈,四個鐘頭,差不多矣。

  梁家權

  

  

回應 (6)
我要發表
梁家權
梁家權 2008/02/28 00:31:47 回覆
Kalo,不是你提起,也忘記寫出來,在打邊爐後段,我一定要飲冰凍可樂。洗和利是最花工夫和時間,洗碗也是,而且你屋企人多就可以買多些種類,否則都唔失點發辦。懵仔魚都用來打邊爐,都幾新鮮。我常有宏願,希望跟漁民去南中國海打漁見識一下,你出身自水上人家,比我們陸上人多一些特別經歷,真好。
2008/02/27 18:25:48 回覆

我同家人都好鐘意打邊爐, 而因為我地係 "水上人" 嘅關係, 我地每次食飯或打邊爐都會買好多海鮮, 媽媽好好, 佢好樂意去購買及預備打邊爐嘅食物, 海鮮啦, 菜啦, 肉啦, 又要洗又要切, 爸爸特別喜歡買 "懵仔" 魚同鱔片打邊爐, 而我就好喜歡食油甘魚, 羊片同豆腐, 仲要一邊食, 一邊飲可樂喎, 唔駛急, 慢慢食, 食飽飽之後我同妹妹都會輪流洗碗, 所以我地好多時候都會打邊爐!

梁家權
梁家權 2008/02/25 16:09:46 回覆

在家中拾下拾下的確好麻煩,又洗又切又要清理,我試過之後都怕怕,冇辦法,都係出街拾好一點。

則卷小雲
則卷小雲 2008/02/25 03:30:47 回覆

我都好耐冇拾下拾下啦! 講起牛肉, 我就真係一個牛魔王黎架! 本地嫩牛肉當然正啦! 口感夠, 比什麼雪花肥牛好吃多了! 現在, 市面有很多火鍋都係得個半鐘, 真係好搵笨, 與其要吃得那樣辛苦, 我情願係屋企拾拾下好過, 最多洗多幾隻碗之嘛!

因為唔使我洗碗, 我當然講得口響啦!

通常係呢d情況之下, 洗碗果位仁兄會拎錢出黎, 並說:咁麻煩, 出去拾啦!

梁家權
梁家權 2008/02/22 12:54:45 回覆
次麗大人,打邊爐的材料的確要絕對新鮮,哈,要不是你提起,我已忘記了羊肉,哎呀,那晚沒有叫羊肉。海鮮真的不錯,而且對湯底的味有增益。
2008/02/22 10:06:35 回覆

我都好鐘意打邊爐ka!!!...

牛肉反而係次要...我比較鐘意"so"味重ke羊片!!!超正~~

仲要有金菇~~^_^...

有海鮮會好少少....蠔,花蛤,脆鯇片...

記得配埋辣豉油!!!咁就好喇~

但我都係鐘意朋友家打多d,冇咁迫,又可以打到幾時都得~

最重要係我唔洗洗碗~~哈哈哈,打邊爐洗碗好煩~

 

不過,用咩料打都好,一定要新鮮~唔新鮮,食完會嘔.......=_=

user