大亨去掃地

大陸人真係可以好有錢，例如一個旅行團，八個人，八個都係地產界大亨，其中一個係07年胡潤富豪榜的中國首富，唔係好多錢唧～～1300億人民幣咁啦！

呢八個人，本來諗住去台灣玩下，兼且掃下地，當然唔係拿住掃把掃地，係真係掃貨咁掃走d地！點知，原來在他們去之前，已經有一批大陸客過左去台灣掃野，全台民眾見到呢班財神爺，都唔理得乜野藍綠對抗咯，見到人民幣自由行，個個笑到見牙唔見眼，於是阿扁將呢件事拿來作為「執政八年以來的最佳政績」，於是北京嬲起上黎，即刻下封殺令，唔畀果八個超級大亨去掃地，要等到大選之後先至再諗。

呢件事，可以從好多方面去睇：

1. 頂，你個死人阿扁，邊個叫你咁多嘴唧！搞到台灣人見財化水！

2. 扁哥，你執政八年，原來最見得人既政績就係呢樣呀？真陰公！你醒就醒過我地既老懵董N倍，但論政績，睇黎同老懵董有得fight！

3. 大選之後先決定畀唔畀大亨去掃地，即係點？馬英九做總統，放行；謝長廷做總統，唔畀去！咁咪即係賄選？仲要係明目張膽果隻！仲要係唔使花中央既錢，班富豪自己磅水……你話胡溫幾犀利！以前老江用飛彈對付民進黨，結果幫了對方一把；現在胡溫不用飛彈用銀彈，高招好多！！！！

4. 北京要搞統戰，其實好簡單。只須不停放大亨過去海峽對岸掃地即可。台灣話細唔細，但話大亦都唔大，掃下掃下，成個台灣「買」左番黎，仲使乜驚民進黨？你想搞公投？好！黎丫，投快d喇！但講明先，我份人就好情緒化既，一唔開心就會加租，全台島民都係我既租客，你咪睇下公投會投成點咯！