紅磡JIS Bon Cuisine 至善薈

2017/12/26 23:17:38 網誌分類: 講飲講食

26 Dec

聖誕節果日做咩？今年唔駛做宅女，表妹請我去佢有份嘅法國/意大利餐廳食聖誕大餐。

餐廳位於紅磡鶴園街恆豐工業大廈地下，確實地點係紅磡崇潔街(加太賀果條街、又名紅磡食街)，從庇利街轉入崇潔街行到尾便是。門口橫睇掂睇都唔似係一間食肆！

餐廳英文名JIS 是三位股東英文名頭一個字----J 係我表妹Jennie，I 係大廚Issac，S 係負責宣傳推廣嘅Stanley. 大廚Issac係前中環Pasta Papa 廚師及前銅鑼灣食街Galano意大利餐廳二廚，該餐廳是我表妹夫開的，後因業主瘋狂加租冇續約，所以結業；該店可以看到煙花，所以除食物外、大時大節有一定吸引力。

表妹有份正職，但似乎對飲食興緻濃厚。這跟個人性格很有關---她對飲食有研究(喜歡通處搵好嘢食---要喜歡食、識食，才懂得欣賞食物)、喜歡結交朋友、更喜歡品酒。Stanley是紅磡區地膽，有一定的人脈，希望今次可以大展拳腳啦。

因為餐廳是今個月初才正式開幕，運作上尚有不盡善之處---不是食物質素問題，是樓面人手問題！相信大家都知道，依家請人難，請好嘅人手更是難上加難！

表妹指出：佢依家差不多每天下午之後都在餐廳打躉、亦於每天晚市前將要注意事項和知職員。

我說：「其實工作唔難，主要係佢地有冇用心去做好份工啫！否則你有你講、佢地意見接受、做法照舊都冇用。」

表妹：「你知唔知你係我偶像嚟？」我：「點會？」

表她：「真架！我覺得你做任何事都好專注、亦好有心架。」(我同表妹有一段時間響工作上有合作過)

我：「咁我承認嘅！一係唔做、要做梗係盡力做到最好啦；不過依家啲年輕人，唉！」

表妹憑自己拚搏，依家最少都係兩家公司股東！

Stanley指佢同Jenny表妹係中學同學，相識相知幾十年，佢係生意人、業務多元化，現今大家一齊打拚、亦多了一個朋友聚腳的地點。

Stanley話佢地餐廳走中上路線，聖誕大餐每位$488，當然不包括生蠔、紅白酒啦！表妹告知：果枝紅酒來貨價都要二千一！我地五個人飲左一枝。