蘋概股麻煩到
先祝各位網友聖誕過得快樂。美股Boxing Day交投清淡，輕微收低。杜指微跌8點，收24746點；標普500指數跌3點，收2680點；納指跌得比較多，跌24點至6936點。
美股較弱，主要受到科技股拖累，科技板塊下跌0.7%，在標普500指數11個板塊中表現最差，元兇則係蘋果公司，跌超過2.5%至170.57美元，係今年8月以來最大的單日跌幅。事緣《台灣經濟日報》及《經濟日報》同時報道，蘋果公司本季度大幅削減iPhone X訂單四成至3000萬部，報道又指iPhone的製造大本營、鴻海集團富士康公司的iPhone X鄭州製造中心已全面停止招工。
消息令到全球的蘋果供應商受創美國Shyworks Solutions 及Micron受累，分別跌1.9%及4.2%。內地藍思科技（Lens Technology）週一重挫8.4%，深圳德賽電池科技（Shenzhen Desay Battery Technology）也下跌5.9%，台灣的大立光下跌4.8%。蘋果到目前仍未有發布11月份銷售數字，也未有就傳媒查詢作出任何評論。
日前已傳出全球最大的晶圓半導體製造廠台積電遭蘋果大砍Ａ11處理器訂單，明年第一季較本季少了三成。另外，內地電訊商通路均已開始出現iPhone X庫存，顯示出iPhone新機熱度明顯開始降溫。
有供應鏈人士指出，明年首季除iPhone 7銷量有機會逆勢走升外，包括iPhone 8、iPhone X等其餘機種銷量都將全面出現季度下跌，今年下半年追單的盛況已不復在，必須等明年下半年新機推出前夕，才有機會恢復成長動力。
全世界有好多公司甚至地區，都係靠蘋果搵食，特別係台灣，此前就有個講法：「一粒蘋果救經濟」，例如台灣三大股王台積電、鴻海同大立光，主要生意都係生產iPhone部件。例如去年iPhones賣得，專製造蘋果手機鏡頭的大立光股價當年股價就勁升67%。近期蘋果噩耗頻傳，先有iPhone X銷路不好，傳出要大砍零件訂單，後傳出蘋果為了催谷新機銷路，公然造假，把iPhone舊機款軟件更生時的計算速度減慢，逼人轉新機，令到市場嘩然，雖然蘋果解釋咁做為了延長電池壽命，防止手機意外關閉，但用戶仍不太信服。
在眾多壞消息頻傳時，所謂的「蘋概股」就紛紛中箭下馬，股價就大幅拉回，例如台灣最大三隻蘋概股，股王台積電比較穩陣，在最近兩個月累跌了7%；鴻海累跌21%，大立光電更恐怖，大插了34%。固然大立光跌得比較甘，另一個主要原因係加入了其他的競爭對手，如台灣的玉晶光和大陸的舜宇光學（2382），但這些股同樣要跌，玉晶光期間跌了近20%，而舜宇光學就從高位跌35%。
蘋果的市佔率正在減縮中。據消費者情報研究合夥公司（CIRP）的數據顯示，截至12月3日的一個月內，美國市場的iPhone X、iPhone 8、iPhone 8 Plus的銷量佔比為69%，是去年iPhone 7推出時的73%，更少過2014年iPhone 6和6 Plus的91%，可見蘋果新手機換機需求在遞減。據台灣媒體分析，由於第二季向來是等待新機的需求淡季，iPhone X恐怕明年上半年將不見好消息，蘋果供應鏈的股價或許將持續下調。
更令人擔心的智能電話市場正全面飽和，大陸開始有這個現象，換機速度減慢中。
就以舜宇光學為例，11月19日創高位152.6元之後，就一路下滑，放假前更失守100元大關，收99.5元，預測市盈率仍然有46.4倍。睇大圍環境，蘋果銷路下滑的趨勢剛開始，相關股份跌勢似乎未止，若睇中線未係時候撈底也。
陸羽仁
Brian:有關1091中信大錳的問題。佢簽融資租賃協議 涉近1.6億人幣，這是普通的售後租回協議，等如一種融資安排，但比貸款更穩定一些，成本更低，你可以將之理解為發債借了1.6億營運資金。
鋼材行業OK，中信大錳生意不俗，8 月升上0.69後急回，按理業績不錯，估計明年出業績後會再上，可以低吸。
2017-12-27
Dow Jones Industrial Average (^DJI)
24,774.30 +28.09 (+0.11%)
《大行報告》中金料iPhone X修正幅度有限 市場對蘋果產業鏈過度悲觀
2017/12/27 14:33
手機股有估值風險
2017年12月28日
港股假後復市上落唔大，收市略為高收，恒指收報29597點，升咗19點。內房股喺悶局中表現算係好啲。大股碧桂園(2007)
曾漲逾7%創逾3個月高，收升5.7%報14.16元，為表現最好藍籌股；融創中國(1918) 
升4.8%收報31.7元；恒大(3333) 
漲3%報收25.6元。
另外，內地由明年1月1日至2020年12月31日，購置的新能源汽車免徵車輛購置稅，受消息刺激，多隻汽車股造好，比亞迪曾升近一成，收升5.8%報68.3元；中升控股(881)
升4%收報17.18元；吉利(175) 
升0.6%報收25.8元。
兩個板塊要防轉勢
年尾係股市執位之時，陸羽仁昨日講到蘋果因為新手機iPhoneX銷量不振，明年首季定單減四成至3000萬部，令到手機設備概念股明顯轉弱。瑞聲科技(2018)
昨日收報137.3元，跌咗3.7%、舜宇光學(2382) 
收報94.95元，跌咗4.6%。
手機設備股同內房呢兩個板塊，今年上半年大力爆升，第三季衝上高點，去到第四季開始反覆上落。陸羽仁同投資銀行家傾起，佢話如果從走勢睇，佢哋有啲似高位出貨，大戶派貨需要時間，所以會扯上扯落，如果手頭有兩個板塊股份，就要留意止賺或止蝕，特別係手機設備股更加要小心，因為佢哋炒到咁高，一話蘋果減少出貨，基金對佢哋未來盈利和估值若然降低，回調幅度可以好大。內房股臨近季結造好，有啲櫥窗製飾維穏味道，可能撩高大戶又會沽下貨。中央政策對樓市唔會好催谷，但亦唔想佢大跌，所以呢個板塊無大升條件，遇到急升就不宜高追，要等佢跌到殘，博阿爺出手扶持嘅時候低吸。
講完基金有可能沽貨的板塊，咁來年有乜股可以留意呢？銀行家覺得美國利率向上，內地銀根都趨緊，明年首季金融股應係穩陣之選。
美國利率趨升，對大部份股票都不利，但利率升代表金融股息率同資金回報率會有改善。呢樣嘢對銀行同保險公司都有利，所以呢位投行大佬都睇好呢兩類股份。個股方面，佢估計平保(2318)
入股滙控後，其他保險公司可能都會買大笨象嚟收息，雖然大笨象已經累積升得唔錯，但相信出年首季都仲有機會慢慢爬高啲。
投行大佬話，若講估值，內銀其實仲係好低，如果內地經濟未來保持平穩，貸款唔點需要撇帳嘅話，咁內銀股估值都唔算好貴。
工行已升仍未算貴
如果唔想動腦筋，工行(1398)
都唔錯，工行依家市盈率超過7倍，喺近年標準來說算係偏高水平，但就比港股大時代6.9元為低，息率4.2厘，已經算係幾年低水平，亦代表呢兩年買佢的投資者都可以收息賺價。
除內銀股外，息率趨升令債息向上，對收取債券利息作為收益的保險公司有利。若然係進取者，好多都買咗平保或者友邦(1299)
。相比下曾經好受投資者歡迎的宏利(945) 
就落後。宏利過去幾年表現，同美國債券利息基本上係同步，美債息口向上，宏利股價就向上，主要係因為佢投資美債收息作為主要賺錢方法之一。最新進展係，隨著國會通過減稅措施，宏利管理層會同時調整資產結構，呢個做法有辣有唔辣，好處是未來公司盈利會增加，代價係需要作出撇除，中短期會影響盈利。
宏利喺多年前賣出唔少收益保證產品俾客呢個策略，呢個策略喺債息回落下好蝕底，亦令到佢股價跑輸大市。
佢呢次佢調整資產結構雖然要撇帳，但主要係帳面上的調整。管理層下定決心重整資產，對公司未來發展唔係壞事。集團之前曾透露想分拆美國業務獨立上市，今次調整資產結構以反映公司最新狀況，有可能係為分拆鋪路。債息穩步向上，理論上對保險股有利，宏利本身亞洲區業務算唔錯，喺宣佈咗呢吓大動作後，有興趣炒落後者可以留意低吸走一轉。
陸羽仁
2018 最後倒數 .....
早
早呀～
Good morning.