大勢

我本身從來不是（極端）大好友或者大淡友。上年大市飆升，我雖然覺得有點超出常理，亦沒有高追，但每次調整時都有買貨，潛意識是認同了。理由好簡單，因為市場是人的地方，參與者的影響力是勝過一切因素的，用經濟指標去決定買入及賣出價，只可不輸，好彩的還有利潤。但要在遊戲勝出，人的因素不可忽視。

在今次跌市期間，我已多次表態，這是大跌市，什麼大反彈及轉勢我也察覺不到（彈得果少少）。11月雖然狂瀉過，但跌市初期，並無意識是跌市，後來又真係彈翻上去，相信好多人都中招。由12月「領」野後（手上股票急速跌價），我已睇淡到4月，期間做淡卻損了手（即日被挾果隻）。

講回大勢，美國有機會衰退已是幾年前的話題，美元貶值也講了幾年。點解現在先發生？美國佬好醒，美資投行同政府既關係更加唔洗講，衰退延遲了，可能真係利用次按相關產品CDO，把唔同方面既壞賬轉嫁其他國家身上（遲早包括信用卡，再使出creative accounting）。你話高唔高明？美國借錢既人，有乘機唔還錢之勢添！不過這是極主觀的睇法。

環球資金及股市由何人控制？美資投行點都佔了一大部分！大陸有自己既基金，但跟美資大行合資主持既都唔少。QDII 不就是方便了他們嗎？一買就蝕錢，大家有眼睇。

大陸強勢，邊個唔知，人人都想來搵食。大陸人既人工升左好多，經濟慢慢轉型，廠家撤出有利有弊。入世貿、攪奧運、贏世姐。仲有台灣攪三通，中國同香港應是大牛市才對。北京學者預計大調整是在2010年。政治市殺傷力驚人，不論是強勢或轉壞，通常兩者一齊來。好像97年，大家憧憬回歸後，大陸會攪好香港，但證明了是一廂情願，根本用共產黨既經驗去管治一處禁繁榮既地方，結果攪衰就得，加上利用香港人盲目樂觀炒上天價，跌返落嚟一定好傷。

簡潔啲去講，美國大選年亦通常係大起大落，但應以跌市收場的。我睇大勢應是先尋底，穿二萬點，但之後到達幾深，專家都答唔到。點解二萬點而唔係乜裂口或平均線，因為一來是整數心理關口，二來甚至要穿817個低位，大家至肯認輸。但反彈的話，大家唔會追到貨，會暴升（不公開講了），在09及10年先來個反轉中國。（要等多一、兩年因為敵方未夠深入我國經濟後防重地）

點解我突然禁樂觀？不是。我擔心大家搵唔到食就真。K姐就當然可以放心。唔通因為跌得多，點都會上翻去？都不是。是因為正如我講，好既、醜既要一齊來，待眾人仍然相信大牛市未死之後，先來真真正正既慘烈大熊市。直通車只玩了兩個月，而跌市亦未見死人。所以要玩大啲，一定會有重大疑似利好消息，炒上n萬點，索先生一類大淡友再狠狠狙擊自以為天下無敵既國家，跌到得萬幾點，這就是大股災。我諗大陸㩒住㩒住，就係唔想有泡沫，並不是如林sir講大陸特色的泡沫是唯一不會爆破。不過亞公千祈不要矯枉過正。宜家仲學人地攪埋期指，只升不跌是做夢。如果我講既大股災一旦發生，就算唔似日本既14年，都唔會响兩、三年內就復原。

最後有人會拗咁玩法對美國有乜好處？唔好傻啦，霸主地位唔會輕易讓出的，你估大陸上左位會同美國做真正朋友咩？