PACO名人會
PACO名人會
PACO名人會

3月合體紅館開騷 Shine:開四面台跳舞鬥肌

2018/01/29 10:41:28 網誌分類: 娛樂
29 Jan

        成軍16年的組合Shine,將於3月在紅館舉行兩場《SHINE*MOMENTSLIVE2018》演唱會。同樣34歲的黃又南和徐天佑坦言要將不一樣的Shine帶畀觀眾,誓要挑戰弱項跳舞。天佑謂:「因為今次開四面台,半年前由零開始日日拉筋,近日才排舞。」又南續說:「我們各自操肌同時,屆時更會互鬥才藝表演,好有新鮮感㗎!」Shine約定Fans會在騷上勁歌熱舞,二人用心備戰、真心付出搞好這個入行15周年演唱會,預祝Shine演唱會成功!

        02年出道即爆紅的Shine,其作品《燕尾蝶》不經不覺已成為一個年代的回憶,更是唱極唔厭的K歌。又南和天佑07年宣布拆夥,直到12年,多得黃偉文邀請在其作品展再度合體,令Shine重生,同年12月已舉行除夕跨年演唱會。今年3月,Shine的兩場15周年演唱會更會挑戰開夠四面台,體力會是一大難題。

        天佑解釋:「上次做三面台無跳舞,但係做完個騷都攰到出唔到聲,今次四面台所花嘅體力會更大。其實演唱會監製都曾勸我哋係咪認真,怕我哋未夠經驗。但我同又南目標一致,時間唔等人㗎!我哋都三十幾歲嘞,覺得而家唔開等幾時呀?認為係時候去挑戰四面台,最終就扑槌!」又南補充說:「正因我哋開四面台,就想呈現出Shine係『跳舞組合』嚟㗎!哈哈!所以個rundown編咗一半時間都係跳唱環節。以前都試過跳舞,但都係兩個人自己跳,今次勁呀!Fight到有dancers,同dancers一齊跳,有型又好睇。」明知跳舞是弱項,Shine去年已開始積極練習,非常認真投入是次個唱,天佑說:「我哋半年前已秘密練兵,由零開始日日拉筋,近日才排舞,熟習舞步後覺得幾好玩。」

        台上battle

        今次演唱會亦有神秘gimmick,兩人在台上Solo時將同時進行比併,近日各自秘密練兵,他們解釋是配合個唱主題「Moments」。天佑笑說:「04年我哋在台灣出過一隻碟,嗰陣時喺台灣宣傳,成日上綜藝節目要才藝表演,打籃球、柔道等,幾日要諗個表演,才會有此構思。」又南記得有次天佑在節目玩完柔道後去食火鍋,怎料突然暈倒入院,當時還笑對方好戲,後來知道堅暈即嚇一跳。又南笑笑口說:「估唔到連食嘢都當係表演,我哋咪一邊食一邊做主持囉!諗番都幾搞笑。所以開騷時,我哋會喺台上有battle鬥才藝,係啲乜要入場先知㗎!」

        天佑日食24隻蛋

        講到明要勁歌熱舞,Shine早前已經各自操肌,屆時Fans一定大飽眼福。天佑說:「今年開始戒食肉,但教練話我淨係食菜唔夠蛋白質,order我日日食24隻蛋,主要係蛋白加幾隻黃,初時聽到嚇親,以為食咁多會死人㗎!」而又南去年10月亦開始做gym狂操,但早前拍戲時不慎受傷,搞到盆骨移位要停工休息。又南說:「嗰陣時腰都傷埋,瞓咗三個星期,但瞓都痛,唞咗成個月。之後操番,而家個身形已經係預計之內,希望大家滿意啦!」完成演唱會後,Shine繼續合體有新project,就是一齊拍梁栢堅執導的本土情懷港產片,天佑爆料:「個故事好有趣,好有港式情懷,我哋由八十年代背景開始,由十幾歲演到三十幾歲,啱晒我哋呀!」

        主持:黃柏高
        統籌:林永匡
        攝影:袁東亮、謝民光
        協力:林書鉉

        

        
 
 ■眼前的天佑(左)和又南(右)比當年我認識的Shine成熟不少,三十幾歲的男人,事業才真正開始呢!
■眼前的天佑(左)和又南(右)比當年我認識的Shine成熟不少,三十幾歲的男人,事業才真正開始呢!
■5年前,又南在演唱會除衫晒肌。
■5年前,又南在演唱會除衫晒肌。
■婚後的天佑變得深閨,近日放風話想生仔。
■婚後的天佑變得深閨,近日放風話想生仔。
 
■日前,Shine興奮慶祝成軍16年。
■日前,Shine興奮慶祝成軍16年。
■15年11月,天佑迎娶拍拖8年的圈外女友Olive,好兄弟又南到場祝賀。
■15年11月,天佑迎娶拍拖8年的圈外女友Olive,好兄弟又南到場祝賀。
■多戲拍的又南,早排整傷腰和盆骨,幸現已康復。
■多戲拍的又南,早排整傷腰和盆骨,幸現已康復。
 
■Shine將首度挑戰開四面台,帶驚喜畀大家。
■Shine將首度挑戰開四面台,帶驚喜畀大家。
回應 (0)
我要發表
user