連審都慳番

你放我一馬

我幫你補罅

今日兩扯平

它朝再議價

俗語話齋、相嗌唔好口、相打唔好手吖嘛！所以喇喎、罪城縣衙實行來一趟大包容、主動向反派遞出橄欖枝、由戒律長來認真究研一吓、看看反盟五祖（掠人李、近身桃、涼茶杰、跪地妝、正盲巫）涉嫌收受西門墨提供嘅金山名產花騎黑柑單畸屎有冇灣轉。結果戒律長憑其個人專業知識判定、呢單畸屎打落去毫無勝算。理由係、經過深入研究過常無獲六判爺當堂釋放嘅理由之後、肯定手頭上嘅證據不足以將反盟五祖入罪。在阿超著褲嘅情況下、局住行使戒肆長職權將此案撤銷、並下令青天衙門不必再查落去。換言之、反盟五祖從今天起可以大覺瞓喇！

講真、做實事的確勝過靠把口講。記得縣太爺就職時高呼與各界有商有量和睦共處、點知原來只係口惠而實不至。今次戒律長一上場就實牙實齒將花騎黑柑單畸屎摺埋、這才叫有誠意。學跪地妝話齋、今次總算還給反盟五祖一個清白、而且件事就可以告一段落、以後就冇晒手尾吖嘛！吓、乜話、你講連花騎黑柑提貨單上都寫明收貨人嘅大號、咁都唔夠料做嘢、唔通真係要當場斷正才算數？唓、家陣邊個同你講呢啲？人家講緊嘅係上次六判爺當堂釋放常無、已經證明那些見鬼單據根本上連個屁用都冇架啦！你哋仲有乜嘢好質疑？家陣究竟係六判爺判案、定係你哋班嘩鬼判案？究竟係戒律長決定是否起訴、定係由你哋來決定？你班友再係咁糾纏不休、信唔信捉晒你哋去摱鐵枝吖嗱？！