陳四姑回塘記

犯民共指太可憐

搲實老番隻爛船

懵然亂踢花家狗

看得花人盡眼冤

近日路過鵝頸橋見唔到「義靈異靈壇」嘅壇主陳四姑開檔打小人、原來係跑到花家去唱衰罪惡城、並惹得一眾藍族喉舌口誅筆伐。之但係、細佬我認為陳四姑今次係幫本城街坊出氣嘅、所以唔止冇鬧佢、反而撐硬佢至係。嗱、鬧還鬧、不過在鬧人之前、必須先搞清楚對方究竟做錯咗啲乜嘢先。冇錯、今次陳四姑跑到花大叔屋企確係唱到罪惡城嘅法治和人權衰到冇人有。但我認為佢講得一啲都冇錯。大家不妨睇睇“捕快拉人、六判放生。黑金直受、常無被放生。暴力集結斷正、傷殼三𡃁被放生。戒律長上台、黑金幫被放生。”嗱、就算係盲嗰個都睇到、所有着數盡歸黃族架啦！那麼、你認為陳四姑唱衰嘅係姓紅還是姓花嘅呢？

俗語都有講、人老老吓就乜都回晒塘架啦！正如陳四姑咁、家陣佢嘅理解能力、表達能力、知感能力、氣力、體力等通通都回晒塘。打從佢嘅言行睇嚟、確係一日懵幾十勻架！如果唔係嘅話、就唔會幻想當真實、冇嗰樣噏嗰樣啦！最近陳四姑更加係懵成成、連佢嘅師妹過咗底畀花大叔都唔知到、仲走入花家當着主人家嘅家丁面前、起勢咁數臭其師妹少德而多寵、才下而位高、無功而受祿、搞到管治和司法都亂過亂世佳人。坦白講、放生肥水幫和黃遮黨當然係管治和司法上嘅混亂、但偏偏係花大叔樂意見到嘅喎！難道陳四姑真係咁豬兜、以為執行放生嘅人係姓紅嘅咩？家陣陳四姑當着狗主面前狂踩其愛犬、唔通真係想學壽星公吊頸嫌命長？如果唔係花大叔早知陳四姑患上「惱人黐外症」嘅話、恐怕早就將佢拋咗落去太平洋餵鯊魚咯！所以話啫、陳四姑回塘反而大利於罪惡城。嗱、各位街坊、你哋就唔好再鬧佢喇！