我撐丐幫

全城不透明

丐幫詐大型

衙門揸正做

犯者以法繩

丐幫數名代表在大年初七早上跑到公家辦公廳門外晒馬、要求揸拂人打得姐從速將過氣揸拂人阿狼押去六判堂受審、並立即將新任戒律長僭建姐炒魷魚。嗱、呢趟在下真係要支持一嘅丐幫至得喇！阿狼嗰單「U.知L.」畸屎揼咗咁多年都埋唔到尾、難怪佢嘅對頭人心急如焚吖嘛！正所謂醜婦終須見家翁、有罪冇罰都要來個交代才對。講到僭建姐就更加係駕勢堂。佢一上任就唔理三七廿一、將前任戒律長（以畸屎拉布見稱）拉布哥所發出“由於證據多到倒瀉籮蟹、須要時間整合”嘅聲明推翻、而換上“唔夠料告”四個字、便將涉嫌收黑錢疑犯全部放生。僭建姐做得咁野火、除咗兜頭兜腦咁狂𨂽拉布哥之外、還要當全城街坊冇到。呢位野火成咁嘅烈女、再唔功成身退嘅話、遲早焫到全城火燭架！知冇？

呢嗱、在下剛剛認為丐幫精神可嘉之際、腦海中又閃出丐幫嘅大長老常無呢壇收取黑錢而被判無罪嘅人版來。一般街坊都將常無單畸屎視之為“戒律長告人、六判爺放人”嘅典範。之但係、稍董戒律嘅人都知到、六判爺係跟據控辯雙方所提出嘅證供來判案的。六判爺認同常無所提出「暫替丐幫袋住先」嘅辦解、於是判無證據顯示常無私吞黑錢、並判其罪名不成立。有一位在六判堂任職嘅友人阿邊個𠸎我講、其實係六判爺挨咗拉布哥一招悶棍才對。當我追問阿邊個、其意思係唔係指拉布哥引用嘅指控戒律條文不貼題時、佢只係話無戒律禁止幫會收取黑錢的。嗱、我就諗唔明嘞、唔知你又諗得明冇？不過當時剛從我兩人擦身而過嘅鵝頸橋金牌打手兩耳婆邊走邊說“法術係有罅”嘅喎！可惜當我想要求佢講清楚啲嘅時候、佢已經好似滾水淥腳咁款、走到冇雷公咁遠了！點都好啦、總之任何事都有多面睇法嘅。注於着與不着、就要看誰的本事更高。所謂在戒律面前人人平等、亦必須要多方面配合才做得到。問題係人心難測、一切皆看罪惡城嘅造化了！