派錢啦

點解平民望派錢

原來真係氣都喘

一姐賣板應知埞

咪個鑿穿阿爺船

早前有人一廂情願話、大掌櫃劏房哥今期會向街坊派錢。嗱、唔知你點睇、但係我就唔多信。經過上次派錢一役、劏房哥一定意識到派錢對其個人無半點好處、但弊端就多到用十隻手指都數唔完。試問佢點會戇居到舂個頭埋場？嗱、無論劏房哥點諗都好、點都改變唔到街坊渴望公家派錢嘅事實。現在嘅問題並唔係劏房哥會唔會派錢、而係公家應唔應該派錢。講到這裡在下實在有點佩服打得姐。當劏房哥公開表示會就是否派錢這個問題諗諗之後、記者就跑去問打得姐是否會派錢、而得到嘅回答就係大掌櫃自有打算。就係咁、個波又交番畀劏房哥了！

在下雖然唔信劏房哥會派錢、但我認為公家係應該派錢的。理由係那筆超過一千五百億嘅盈餘全部都係從稅收方面而來的、其中不少是來自賣地和印花稅等收入、而高地價政策就是導致樓價高企其中原因之一、而樓價高企是導致街坊生活成本高企嘅主因。講來講去都是公家和商家齊齊賺到盤滿砵滿、而那群做牛做馬嘅街坊大眾卻未能分享到半點大豐收嘅成果。嗱、公家建公屋慢、建居屋慢、改善醫療服務慢、改善老人服務慢、退保又唔肯攬上身、總之就係推、則、閃、避、卸五瓣俱全。除咗在教育方面嘅五十億撥款大開中門之外、其餘嘅民生項目建設大概可以用「乜都做唔嚟」來形容、所以派錢是唯一能令到街坊消氣嘅方法。坊間質疑、何解公家對於教育項目慷慨有嘉、而對其它民生項目卻如此吝嗇？有人話、教育跟政治嘅緊密程度、係其它民生項目望塵莫及嘅。嗱、係唔係都冇所謂、擺在眼前嘅事實就係官商齊富貴、坊間嘆閉翳、劫貧「製」富嘅形象已經深入民心。如果在這個時候再唔肯撥筆銀兩出來𧨾吓街坊、係咪要等到隻鑊爆咗之後才去補呢、吓？！