庹縮預算

庹到離晒譜

門票換元寶

街坊唔夠運

又見守財奴

早就料到今年嘅財政預算一出即遭鬧爆。縱觀報告內容、大致上係以上次阿𠾍嘅預算報告為藍本稍作加減湊埋一碟便上枱。不過新人士點都會有啲新創意嘅。因此劏房哥建議向每位小學生派發海記公園入場卷一張、但唔派家長嗰份。如果家長諗住唔好嘥咗張飛嘅話、記緊帶多啲銀両去陪仔女齊消費。難怪有人話劏房哥比阿𠾍哥更加算死草啦！依我睇、奇實劏房哥闊佬至奇。眾所周知、佢老人家當年係出租劏房、炒賣物業、囤積地皮嘅大行家嚟、嗰個淨係曉得嘆咖啡和睇法國電影嘅阿棄哥同佢挽鞋就差不多。從前阿𠾍奉命掌管大賬房鎖匙以牽制阿狼、今日劏房哥奉命掌管大賬房鎖匙來牽制打得姐、這叫有禮上往來。嗱、各位街坊、其實大環境一切冇變、為乜要鬼殺咁嘈啫？

今次財務預算報告雞乸咁大隻字闡明「在未來五年內」公居兩屋將會提供十萬個單位。即係話、每年平均推出兩萬五千個單位、而且係白紙黑字寫到明架！嗱、財務總管作出呢個預算、係咪應該備受贊賞呢？不過要搞清楚嘅係、上述單位之所以能夠露出曙光、其實係阿狼在任時所打下嘅基礎嚟、並且早就預計將會在今後五年左右陸續見到成效。因此有關公居兩屋方面嘅預算、實際上係前人種果後人收而矣！仲有呀、那些甚麼以重建醫院為手段增加病床等一系列嘅建議、唔見得係新鮮事物、大概亦只係承接上手二攤。若論新創作、除咗上述嘅派發海記人場券之外、就係每個有須要學生可獲派兩千元現金補貼。所謂嘅儲錢為未來增加競爭力嘅講法、在下就真係完全感覺唔到喇！如果要為預算報告打分嘅話、在下只能給劏房哥打上「抄書」分數六十分。注於前瞻性、創作性、突破性等就唔打分好過打分、以免難睇啦！係嘛？！