忽然「草根」?

2018/03/02 06:55:20 網誌分類: 經濟
02 Mar

長久以來,我都認為自己屬「中產階級」,祇因我交稅係最高百份比、公屋固之然冇、居屋又過額、私樓又買唔起;直至到可以申請政府房屋津貼,捱生捱死、捱到提早退休,才有錢清付銀行貸款!依家啲年輕人成日投訴買唔起樓,其實佢地上一代、上上一代咪一樣係死慳死抵先成為有殼蝸牛!

生活是比上不足、比下有餘,仲唔係中產!當時我老板住半山豪宅,管理費多過好多人每月薪金,佢都稱自己是中產;我當時笑佢:「如果你咁都叫中產,我咪係草根以下果層?」

過去咁多年,每年財政預算推出,大部份人都指政府冇照顧中產階層;我屬於冇被照顧者,咁仲唔係「中產」?

哈哈!今次一覺醒來,才驚覺自己已淪落為草根階層!

一. 退稅---退休後,我雖然每年仍要交稅,但交得少,冇咩嘢著數!

二. 子女免稅額---冇!

三. 傷殘人士免稅額---冇!冇理由為此而打跛對腳架。

四. 父母免稅額---冇!

再諗深一層,我連草根也不是!草根階層有份食嘅糖我又冇=--我係夾響「中產」同「草根」之間果一層!

我諗受惠係醫療劵一次過派多一千個大餅囉!呢樣嘢同年紀掛鉤,與階層冇關;至於醫療劵可累積至五千蚊其實冇咩作用,病起上嚟,睇一兩次醫生就用晒二千蚊,想累積都難!我是退休公務員,可以免費睇政府醫生;但係政府覆診時間隨時等成年(分分鐘死左都未輪到你覆診),因此,我自己另有買醫療保險,但不包括睇中醫!現時要睇中醫便要動用醫療劵---去年咳左個幾月,睇兩次中醫經已用左千三蚊,所以對一般長者而言,每年二千蚊醫療劵祇屬聊勝於無!唔係每位長者都好似我咁:有三個選擇!

仲有受惠嘅係免差餉囉!

最好笑我昨早聽電台,財爺話唔津貼電費係因為環保喎!咁不如佢帶頭--返辦公室穿便服、(反正依家啲「垃圾已完」出席「垃圾會」會議都係唔顧身世架啦)寫字樓冇空調、出入踏單車吖!

回應 (2)
我要發表
2018/03/03 07:52:03 回覆

係喎!食屎最環保。

2018/03/02 15:38:10 回覆

財爺話唔津貼電費環保?咁叫佢唔好食飯咪更加環保囉!

user