4月紅館個唱閃爆登場 黎瑞恩操Fit節食狂練舞
2018/03/05 10:11:15 網誌分類: 娛樂
當年寶麗金小花之一的黎瑞恩(小恩子),自去年出完發燒碟見反應不錯,便打算入紙紅館開個唱,沒想到申請咁快成功。為答謝fans多年的支持,今次個唱會像開party一樣,除了以她喜歡的印度色彩和blingbling閃爆登場,小恩子更會唱出自己的hit歌和其他歌手的經典金曲。雖然大病初瘉,但現時她既要減食肉,又要做運動Keepfit,她笑言今次有好多的第一次,最怕就是跳舞,不過有信心做到最好,「雖然我條腰粗粗哋,但我都扭得兩下!」預祝演唱會成功! 黎瑞恩《感恩有你演唱會2018》將於4月5日和6日在紅館開鑼,其實歌手要踏上紅館舞台絕非易事,小恩子坦言冇想過咁快成事,「上次出完發燒碟後反應都幾好,公司問我想唔想開演唱會,我話冇所謂,不過申請得嚟都應該2020年,諗住慢慢遞吓紙先,但我真係好好彩,遞咗4次紙已經OK咗,所以都有啲緊張同期待。」 色彩配閃閃嘢 提到今次演唱會的特色,小恩子透露:「我諗住加入印度嘅色彩,會有好多顏色,因為近年香港好似有好多怨氣,希望大家睇到會開心啲,加上入得嚟睇嘅都係我嘅fans,一齊成長都二十幾年,所以呢個演唱會係一個party,將會係大家嘅集體回憶。」而她的造型更是別具心思,「你知道印度好多blingbling嘢,其實我本人都好鍾意blingbling,閃晒咁樣,服裝設計就問我想唔想閃死啲觀眾?我笑話梗係好喇,佢會整晒啲鏡落件衫度,幾得意㗎!」 因病遲咗排舞 小恩子表示個唱的監製和樂隊班底都是第一次合作,連跳舞都是第一次,「真係有少少驚,點解?因為病咗一排,本來要預早去排練,但因為唔舒服冇得排,要去到2月尾先開始,但都OK嘅,我都扭得兩吓,雖然條腰有啲粗粗哋。」她稱在娛樂圈的時間約7、8年左右,歌不算多,感恩去年仍有碟出,而個唱主要唱自己的歌,「有啲歌大家都好熟識,好似《一人有一個夢想》,又會唱少少人哋嘅歌如陳潔靈嘅《星夜星塵》;由於我細個成日參加歌唱比賽,可能都會唱吓啲參賽歌曲,記得第一次參加比賽係唱林憶蓮嘅《衹可活一次》。」 食素做Gym操練 為了準備演唱會,小恩子亦要加緊操練,她說:「平時我好少做運動,都係行吓山、打吓Golf,比較慢啲,但𠵱家都要跑吓步,跳舞對我嚟講係比較劇烈,或者會搵個健身教練做Gym舉吓嘢,(最緊要體能可以應付到兩個幾鐘嘅個唱?)照我推測應該OK嘅。」至於飲食方面都要注意,小恩子表示她現在食素,她解釋:「我唔係好食肉,因為食得肉多,體內會產生好多酸性,所以𠵱家都要食清啲。不過我都有食飯,唔食飯冇氣㗎,亦鍾意煲湯飲,仲好足料?!」希望小恩子帶給大家一個既開心又enjoy的party! 主持:黃柏高 統籌:林永匡 協力:李佩儀 攝影:謝民光、袁東亮 場地:MoonThai(上環) |
| |
| |
| |
| |
| |
| |
| |
|
回應 (0)
我要發表