唔提話事

2018/03/08 15:25:19 網誌分類: 講人自講
08 Mar

 

何謂真真何謂𧥺

各人視聽各繽紛

諸君咪話唔通氣

聽我講來像嚿雲

 

當老記追問打得姐、對於紅家會二當家木子哥並冇像往屆一樣在其未來計劃報告內提及「由你話事」一詞有何睇法時、佢只係話有啲嘢大家心照就可以、無須經常掛在嘴邊喎!嗱、呢啲咪就係前朝精英應對圓滑嘅精彩之處嚟囉!不過咁、無論幾圓滑嘅人都難免會有條脷打纈嘅時候。例如上次大炒車爆發之後、打得姐公開以“很多謝總舵關心、罪惡城揸拂堂有足夠能力做好所有善後工作”去回應總舵主傳來嘅慰問。本來一句平常嘅回應、係唔應該有問題嘅。之但係、如果話中出現咗劃蛇添足嘅情況、又或者有異於慣常表達方式嘅話、就很容易令人有所聯想。

 

我記得、在南天門(八狗六死)示威高鋒期間、南天門外圍分別有七支動向不明朗嘅人馬集結。遠在南方指東省亦有示威、當中嘅五羊城街坊放晚飯後跑到街頭集結、而指東省揸拂人帥二代亦身在現場、佢當時當講:“我哋指東省冇事、你哋罪惡城都冇事”喎!坦白講、當我聽完那番話之後、登時有一陣毛骨悚然嘅感覺。因為大示威是覆蓋全個神州而非獨係指東省、所以帥二代用詞應該係「神州冇事、罪城亦在冇事」才對。果然、過不了多天之後、智慧老人突然急召各省刀頭到繩都密斟。結果係、由他個人孭起下令鎮壓嘅惡名、而取得清場共識。聽聞話、那一趟急召成功化解咗一場內戰之危。否則、神州可能已經四分五裂成為多塊、而指東省就是其中的一塊。

 

根據紅家會過往嘅習慣來看、今次二當家報告唔提「由你話事」一詞、很可能另有深意。加上在較早前西廠揸拂人十二哥忽然毫不避嫌的宣布中西兩廠拍住上看來、就更加會令人聯想到紅家會已經不大放心「由你話事」了!坦白講、近期發生多宗反常事件、包括跟「抬毒」結盟嘅被打柴本土派尊貴可以獲准入閘重賽、以及一連串放生事件、無一件不是踩過了總舵劃下嘅容忍線。如無估錯、今次嘅「唔提話事」只係席前小吃而矣!當綽號打虎王嘅八當家正式出任副舵主之後、真正嘅菜式就會陸續上枱架喇!各位街坊等着睇好戲啦!

 

 

 

回應 (2)
我要發表
2018/03/09 23:52:47 回覆

打得即是唔打得、唔打得即是打得。一切隨心所欲。

2018/03/09 18:15:50 回覆

我開始覺得號稱打得的其實唔打得!

user