演員大爆《果欄》精采劇情 煒哥被指「甘草」好Hurt
2018/03/12 11:11:18 網誌分類: 娛樂
油麻地果欄在香港屹立過百年,多年來都由男性主導。在TVB新劇《果欄中的江湖大嫂》中,陳煒和岑麗香卻要反傳統直闖果欄望出人頭地,但最終煒哥還是返電視台搲撈,卻畀人鬧連甘草演員都不如,Hurt到爆;而飾演她姪女的香香,由乖乖女變辣椒仔,經常講道理兼鬧人,她坦言是挑戰。至於袁文傑會追求煒哥、楊明與父親劉江對立,以及王卓淇與甄詠珊這段改編自真人真事的母女情,同樣精采。 所謂「江湖大嫂」,並非指社團話事人,而是指新一代的女強人。劇中本已嫁人的煒哥因負債返港,偕姪女香香想搶回果欄攤檔業權,因而與黃光亮及黃浩然成為鬥氣冤家。期間煒哥對飾演議員的袁文傑產生好感,雖然身份地位懸殊,但最後煒哥不介意,仲主動追求對方;香香和黃浩然亦因慢慢了解而互生情愫。而飾演社工的楊明為了幫助弱勢社群,遇到迷途少女王卓淇,便導她返回正途。 演出有難度 談到在劇中的演出,各演員均表示有難度、是個挑戰,尤其是煒哥和香香今次要做「惡女」和「煩人」。 陳煒:「喺劇中我係一個好強嘅人,所以場場戲唔係鬧人就大大聲講嘢,其實我好斯文㗎,所以個角色都難演。」 香香:「之前我做啲好sweet同乖女嘅角色,常被人保護,但今次好有正義感,見到無理嘅事就會出聲,所以我都幾煩㗎!」 王卓淇:「因為我同劇中媽咪甄詠珊關係好差,但現實中我同媽咪又好少嗌交,所以要幻想好多衝突出嚟,再諗吓點演。」 楊明:「我老豆劉老師係果欄商會嘅會長,有個好大嘅果欄,因為佢係潮州人好重男輕女,佢好想將事業交畀我,無奈我有生果敏感,幫唔到佢,仲因為做社工嘅我要幫啲工人討回公道,成日同佢對立。」 袁文傑:「我係一個好有抱負嘅議員,成日想改革果欄,過程中認識到煒哥,覺得佢充滿幹勁,又有諗法;開頭諗住利用佢,點知合作期間發生咗感情,同埋其實我唔係好慣人哋做主動追我囉。」 劇透精采位 問到劇中的精采內容,演員們劇透既有感動位,又有浪漫位,還有性感場面,總之好吸引。 陳煒:「大嫂後生時啱啱讀完書出嚟係做三、四線演員,後尾嫁畀江湖大佬就息影,但十幾年後返番果欄由頭開始,但女人要喺果欄立足真係好困難,我做唔掂諗住返電視台拍戲,點知觀眾睇我連甘草都不如,好hurt,喺嗰度都食咗唔少苦頭。」 香香:「有場戲講我同黃浩然啱啱開始有火花,大家唔知鍾唔鍾意大家,嗰場一開始我整蠱佢,要佢用木頭車推我喺成個油麻地走一轉,之後佢想整蠱番我,喺斜路好快咁衝落去,過程要吊威吔好刺激,到架車慢慢停落嚟我哋互相對望,先覺得好浪漫。」 王卓淇:「我想分享我最緊張嘅一場戲,就係第一次喺劇入面着泳衣,自從選完港姐之後,我唔想再着泳衣,因為我覺得自己太瘦,於是為咗視覺效果好啲,我特登食多啲嘢,結果肥咗喺塊面度,好在出嚟嘅效果都ok,係健康嘅性感。」 主持︰黃柏高 統籌︰林永匡 攝影︰袁東亮、謝民光 協力︰李佩儀 場地︰重慶劉一手火鍋 陳煒服裝:Marella 岑麗香化妝:ZoeFan 髮型:ZapTang 服裝:MargarinFingers(岑麗香) |
| |
| |
| |
| |
| |
| |
| |
|
回應 (0)
我要發表