豬嘜

狀棍暗搞鬼

豬嘜二仔底

兩者成一對

神仙冇眼睇

所謂「天作孽、猶可恕、自作業、不可逭」吖嘛！上次負責看守「填氹擂台大賽」門口嘅閹雞委員會（閹委會）䁯眼瞓、唔覺意放咗幾個毒派代表入閘打擂台而鬧到滿城風雨。殊不知、今次班閹委忽然瞓捩頸而重蹈覆轍並觸犯眾怒。藍思企圖以「弱軒非法入閘」為理由向六判堂申請翻案、並希望藉此打掉弱軒嘅尊貴資格。另一邊廂嘅長島蝠瞎王傻堅亦以「銀子建港與銀子建國兩者同屬毒派」而要求翻案、藉此打掉銀子建港代表扔舜嘅尊貴資格。現在又輪到被拒絕入閘嘅兜庭以閹委大細超為理由、要求六判爺宣布填氹大賽無效。由此可見、篩委會辦事唔清唔楚、搞到全城亂七八糟、毫無準則可言。難怪社會上對篩委會惡評如潮啦！

呢嗱、雖然長島蝠瞎王傻堅今次擺明係混吉、但兜蜓就唔係人咁品嘅。既然連當眾焚燒國旗嘅弱軒、以及當眾示範拖喼而引出鳩烏來嘅架喱威都能上擂台、為何偏偏只有兜蜓被拒之於門外？我唔係黑心、亦非幸災樂禍、如果兜蜓成功使得氹填大賽變成流賽嘅話、咁就真係夠晒㜺鬼喇！到時真係要睇睇、究竟揸拂人點樣向總舵主交代。罪惡城揸拂班子號稱問責、但實情係有過而不問責、甚至擺出一副「懶得睬你」嘅嘴臉出焫班街、簡直係豈有此理。嗱、我並唔係潑冷水、今次那些針對閹委會而作出嘅法律動作通通都係多餘嘅。因為早前六判堂已經裁定、閹委會有絕對權力決定閹誰就閹誰、放誰就放誰的。再加上本城揸拂人又係非常之尊重篩委會嘅決定、所以嘛 … … 挑戰閹委會決定直程係「煲燶藥」嘥心機啦！係嘛？！