《做隻不厭世的旅行青蛙》

對於現今面對多重生活壓力的香港打工仔，治癒比起刺激既活動更為吸引，一隻以前必定被評為無聊既遊戲竟然迅速俘虜左大家既心，成為大熱。可以不用多費神，無時間限制，而小青蛙又會帶黎日本唔同地方風特色既明信片，稱唔上「好玩」，但箇中得到既輕鬆感會令人記掛住，得閒開黎睇下養既青蛙仔歸家未，完完全全寄託左自己想出走既心靈。

好多年青一代成日將旅行掛係口唇邊，返工搵錢為左儲旅行洗費，辛辛苦苦等返黎既年假都係計劃好晒去旅行遊玩。如果純粹厭世，覺得既然返工咁痛苦，理所當然要做一啲事去補償心靈，匆匆忙忙周圍去著名既景點打卡和瘋狂自拍幾日，又真係可以零後遺症地達到目的嗎？

其實你心底裡好清楚知道，期待以久既旅行，幾日後返黎都係要重回正軌既生活。一放完假，就要準備定分派手信俾同事，加班幾日去還債，仲可能聽到有同事抱怨你連放幾日假要幫你執手尾等等……轉換唔到心態既話，幾日既快樂衝擊就會俾佢地幾句說話即時打敗，又墮回深淵，只能盲目地捱到下一次去旅行既時間。

抱住厭世既心態去旅行，只係一種自我催眠，得不償失。

大家嚮往旅行青蛙，係因為佢無任何顧慮，執好行李又可以去一轉！對小熊黎講，每次去旅行都希望有一個不枉此行既旅程。雖然一樣無可能將工作上既煩惱完全拋開，但係會好投入感受當地既氣息。事前一定要練習少少體力，唔係久坐電腦前既我第二日就已經會行到腰痛，站與站之間如果相隔唔遠，我同男朋友一定選擇走路，會睇到更多風景和當地人既生活模式。大景點會計劃晒點去，絞盡腦汁度好晒所有交通方法盡量省卻時間，然而好多時穿梭大街小巷有新發現時總會更興奮！番黎推介俾朋友！去完一趟旅行，每次回味時會驚嘆認識呢個世界太少，生活仍然充滿好多未知既樂趣，反而對面前繁複既工作睇得無再咁上心，因為我應該花心力係喜歡既事上面。