好耍得

阿姐發財又發德

有人有脈有姿質

偏偏遇上霉酸氣

嚇壞佳人更受屈

呢嗱、除咗勝利容易沖昏頭腦之外、原來人坐得越高頭腦亦會越昏架！我哋嘅打得姐本着畀面老朋在嘅心情出席白鴿會嘅壽晨派對、並少少哋拎三萬両出來買枝白鴿標之嘛！點不知、咁都被人解讀成中廠當眾聚賭。更弊家伙就係、唔知邊個咁大整蠱、在佢𠸎白鴿會朋友合影嘅照片上寫上「大禾鞋」三隻大字、搞到城中嘅大喇吧、小喇吧吹到鬼殺咁嘈。起初打得姐都懶得理啲咁嘅噪音嘅。之但係、佢越係唔出聲、嗰啲大小喇吧就吹得越係大聲。於是佢咪話畀大家聽、照片上嘅字句係同事多手加上去嘅囉！嗱、我係相信打得姐架！信係有兜㕲嘴在未得打得姐同意之前就擅自擺佢上神台架！呢壇嘢令到打得姐形象受損、仲弄污糟中廠個招牌、簡直係罪大惡極、若不即炒焉能以儆效尤？唔知炒咗未呢、吓？！

呢件事令我想起、當年掃把姐當關卡部主管時、明明係佢嘅手下做錯事而受到輿論界猛烈評擊。之但係、掃把姐居然跳出嚟承認責任、並向全城街坊鞠躬道歉。雖然事件得以平息、但佢就孭起咗第一隻鑊、後來因為再孭起二十三兜失敗隻鑊、連份工都掉埋𠻹！當時嘅掃把姐簡值係我嘅偶像嚟。因為推、則、閃、避、卸嘅大老爺我就見得多、像掃把姐呢類肯孭鑊大老爺、還是第一次見到架咋！打得姐跟掃把姐同出一門、但身為師姐嘅掃把姐在仕途方面就比不上小師姐打得姐了！講到撈世界呢家嘢、笨笨實實嘅人只適宜用來孭鑊或墊底、跟那些曉得睇眉頭眼額和走精面嘅人係唔同檔次嘅。呢啲叫作現實吖嘛！今日嘅掃把姐身上再也找不到惜日拍心口頂硬上嘅豪氣。打得姐亦唔係當日大大聲講“無求膽自大”嘅打得姐。因為打得姐已經領略到做事無須硬橋硬馬、只須耍太極咁耍、將啲衰嘢耍晒畀班細嘅就掂過碌蔗架喇！