籠裡雞作反

2018/04/04 14:23:17 網誌分類: 講人自講
04 Apr

 

此君做事大猖狂

家醜鬧上議事堂

中廠登時矮半截

陰濕炸彈要提防

 

打得姐手下三條 A 之中、除咗大管家電鐘哥之外、其餘嘅大掌櫃阿茂哥和戒律長僭建姐皆被街坊鬧爆。之但係、電鐘哥呢回可能被一單濕滯畸屎㘉濕個身咯。日前食玩處(食記)向議事堂投訴渥雨處嘅滲水辦公室(滲記)處理滲水投訴速度慢過蝸牛、屯積嘅畸屎堆積如山、連申請人屋手令都劈低埋畀食記去做、累得食記頻頻替滲記孭鑊。據食記主管講、佢曾經多次向上頭反映過有關問題而不獲處理、在迫於無奈之下、才跑到議事堂爆大鑊。

 

揸拂堂自百年前由前朝開堂以來、從來未發生過兩個政策部門之間嘅爭拗須要訴諸於議事堂嘅。呢趟都可謂開創了歷史先河。今次食記抐起個肚皮畀人睇、表面上係有冤無路許、但我總覺得矛頭真正指着嘅係一姐。身為部門主管冇理由唔知到駕空整個中廠、而向議事堂告狀係違反「按級呈遞」嘅公人守則、屬於嚴重違紀行為嚟。這件事暴露出蚊責團隊跟公人隊伍之間嘅合作出現嚴重問題。如果揸拂人從外邊入主中廠、在短時期內雞手鴨腳尚可理解、但打得姐本身在中廠擔任高職多年、冇理由會搞唔好自己團隊跟政策部門之間嘅合作。所謂家有家規、國有國法、現在中廠轄下部門不按本子辦事、身為一姐理應向有關司局長追究責任。否則、佢就要自己承擔起所有責任。坦白講、外邊人看此事、可能當作笑話一宗。之但係、熟知揸拂堂運作嘅人看見此情形、難免會擔心產生骨牌效應。因為中廠內部爆發鬥爭必定會拖累公務以致激發眾怒。由其是政客插手公人隊伍紛爭勢必政治化、是件非常危險的事。如果不從速糾正過來嘅話、政治爭鬥就會殺入政策部門、到時必定天下大亂。如果我係打得姐嘅話、就馬上亡羊補牢、以防事件繼續擴大嘞。

 

 

回應 (0)
我要發表
user