喂、做事啦！

亡羊不補牢

冚家鬥勞嘈

台前演鬧劇

幕後鬥污糟

連日來、紅藍喉舌不停的瞄準散播講毒嘅妖蜓狂噴口水、大有以口水來浸死呢隻妖孽之勢。之不過、口水係浸佢唔死嘅、除非在罪城家法中闡明鼓吹港毒都係死罪、否則講多都嘥氣。近日講古佬雙番東𠳕咗一大拃甚麼安全法條例出嚟、話可以引用來將妖蜓繩之以法。嗱、如果那些例行得通、就無須等足三年多還未將戰中搞手帶上六判堂嘛！早排在窮人食堂無意中聽到大撞棍 Martin Marvel Lee （馬丁賣忽李）對班黃仔講、嗰啲條例係大影細閣（影閣）下來嘅過時遺產、只適合用於防止罪城街坊做出任何傷害影閣利益嘅舉措。嗱、我真係想問一句、邊句至係真架？但係咁、如果罪惡城真係有安全法嘅話、以妖蜓呢壇法術教棍來講、係冇可能會舂個頭埋去嘅。

坦白講、在下雖然在本城土生土長、卻發覺自己對城中街坊實在不甚了解。由其是、對於那些民選尊貴、更加係越來越覺得陌生。無係真反紅又好、偽愛紅也罷、唔止冇為街坊帶來甚麼好處、反而使得本城爆發分裂、黃藍兩方擁躉各走極端、為着政見不同連親朋戚友都變成陌路人、甚至翻臉成仇亦大有人在？究竟佢哋有啥深仇大恨、係都要互相憎恨到連理性都失埋？無論你要不要聽都好、事實上、在大歸廿年以來、政棍與政棍鬥、反盟與中廠鬥、已經鬥足廿年。試問除咗吵吵鬧鬧之外、到底街坊得到些甚麼好處？眼前所見嘅就係住屋、醫療、教育、職業上嘅選擇、基層收入、人們嘅快樂指數等、全部都係人衰行路打倒蹆。呢個現象連「聯合閣」都已經紀綠在案、卻只係本城街坊當局者迷。依我睇、好話壞話都已經講咗廿年、理應乜都講晒、現在係做實事嘅時候。假如一姐唔信鏡、我敢寫包單、佢一定後悔。